ھەرێم نیوز

لەگەڵ هەڵکشانی خێرای تواناکانی ژیریی دەستکرد (AI) و هاتنەئارای هۆشداریی شارەزایانی تەکنەلۆژیا سەبارەت بە مەترسییەکانی بۆ سەر ئایندەی مرۆڤایەتی، شەپۆلێکی نوێی لێکدانەوەی ئایینی لە ناوەندە مەسیحییەکاندا سەریهەڵداوە کە ئەم شۆڕشە تەکنەلۆژییە بە ڕووداوەکانی "کۆتایی جیهان" و هاتنی "دژە مەسیح" (المسيح الدجال) گرێ دەدەن.

لە پلاتفۆرمە جیاوازەکانی وەک تیکتۆک، پۆدکاست و وتاری کەنیسەکاندا، ژمارەیەک لە قەشە دیارەکانی ئەمریکا هۆشداری دەدەن لەوەی ژیریی دەستکرد ڕەنگە ببێتە ئامرازێک بەدەست شەیتانەوە بۆ فریودانی مرۆڤەکان و ڕاکێشانیان بەرەو پەرستنی خۆی، تەنانەت هەندێکیان وەک "وەحشی دووەم" یان پێغەمبەری درۆزنی ناو دەقە ئاینییەکان ناوزەدی دەکەن.

بەپێی ڕاپرسییەکی ناوەندی لێکۆڵینەوەی "پیو" (Pew Research)، نزیکەی لەسەدا ٤٠ی پێگەیشتووانی ئەمریکا و لەسەدا ٤٧ی مەسیحییەکان لەو باوەڕەدان کە جیهان لە سەردەمی کۆتاییدا دەژی.

بەڵام پسپۆڕانی کۆمەڵناسی و ئایینزانی دەستنیشانی دەکەن کە ئەم جۆرە ترسە مێژوویەکی دوورودرێژی هەیە و لە هەر قۆناغێکدا کە گۆڕانکاریی قووڵی کۆمەڵایەتی و تەکنەلۆژی ڕوودەدات، مرۆڤ مەترسییەکانی سەردەمەکەی خۆی بەسەر کەسایەتیی دژە مەسیحدا دابەزاندووە؛ وەک چۆن لە سەردەمی قەیرانی گەورەی ئابووریدا ڕۆزڤێڵت، لە جەنگی سارددا یەکێتیی سۆڤیەت، و ئێستاش ژیریی دەستکرد خراونەتە ناو ئەو هاوکێشەیەوە.

شارەزایان ئاماژە بەوە دەکەن کاتێک تەکنەلۆژیا بە خێراییەکی باوەڕپێنەکراو پەرە دەستێنێت و هەڕەشە لەسەر هەلی کار و شێوازی ژیانی مرۆڤ دروست دەکات، هەستکردن بە لەدەستدانی کۆنتڕۆڵ زیاد دەکات؛ لەبەرامبەردا، پەنابردنی خەڵک بۆ گێڕانەوە ئایینییەکان هۆکارێکە بۆ دەستخستنی دڵنیایی و ئەو باوەڕەی کە ڕووداوەکان بەپێی پلانێکی ئیلاهی بەڕێوەدەچن نەک بە شێوەیەکی هەڕەمەکی.

لە هەمان کاتدا، بەشێک لە بیرمەندانی ئایینیش جەخت لەوە دەکەنەوە کە دەقە پیرۆزەکان بۆ پێشبینیکردنی ناوی کەسەکان یان تەکنەلۆژیا نەهاتوون، بەڵکو دەبێت مرۆڤ لەبری دڵەڕاوکێ و ڕەشبینی بەرامبەر داهاتوو، پابەندی ڕەوشت و خۆگونجاندن بێت لەگەڵ گۆڕانکارییەکاندا.