هەرێم نیوز
ڕۆژنامەی "واشنتن تایمز"ی ئەمریکی بڵاوی کردەوە، کۆکردنەوەی چەک لە دەستی دەوڵەتدا کلیلی گۆڕینی عێراقە بۆ ناوەندێکی گرنگی ئابووری و وزە. ڕاپۆرتەکە هۆشداری دەدات کە بێ جێگیربوونی یاسا و سەقامگیری، ئەو ڕێککەوتنە ٦٠ ملیار دۆلارییەی لەگەڵ کۆمپانیا جیهانییەکان واژۆ کراون، جێبەجێ ناکرێن.
گۆڕانی پەیوەندییەکانی بەغدا و واشنتن و گرێبەستە ئابوورییەکان
بەگوێرەی ڕاپۆرتێکی "واشنتن تایمز"، پەیوەندییەکانی بەغدا و واشنتن لە دۆخێکی سەربازییەوە بۆ هاوبەشییەکی ستراتیژیی ئابووری گۆڕاون. لە کاتی سەردانەکەی عەلی زەییدی، سەرۆکوەزیرانی عێراق بۆ واشنتن لە تەممووزی ئەمساڵدا، زیاتر لە ٥٠ گرێبەست لەگەڵ کۆمپانیا گەورەکانی وەک "شیفرۆن"، "بی پی" و "شێڵ" واژۆ کراون.
ئاماژەی بەوەش کرد، ئەم پرۆژانە جەخت لەسەر کەرتەکانی نەوت، غازی سروشتی و دەستەبەرکردنی کارەبا دەکەنەوە تاوەکو عێراق ببێتە جێگرەوەیەکی جێگیر بۆ بازاڕەکانی وزەی جیهان، بەتایبەت لەم کاتەی کە مەترسی لەسەر تەنگەی هورمز هەیە.
کۆسپە ئەمنییەکان و مەترسیی گرووپە چەکدارەکان
بەڵام ڕۆژنامەکە ئاماژە بەوە دەکات کە بەردەوامیی گرووپە چەکدارەکان کە ژمارەیان بە ٥٠ هەزار کەس مەزەندە دەکرێت، گەورەترین کۆسپە لەبەردم ئەم پرۆژانەدا. ئەم گرووپانە خاوەنی موشەک و چەکی پێشکەوتوون و لەژێر فەرمانی تەواوەتیی دەوڵەتدا نین، کە ئەمەش دڵەڕاوکێی لای کۆمپانیا جیهانییەکان دروست کردووە.
واشنتن تایمز جەختی کردووەتەوە کە دەبێت هەڵمەتەکەی عێراق تەنیا کۆکردنەوەی چەک نەبێت، بەڵکو دەبێت بڕیاری جەنگ و ئاشتی و تەواوی چالاکییە ئابوورییەکانیش بکەونە ژێر کۆنترۆڵی فەرمیی حکوومەتەوە تاوەکو وەبەرهێنەران متمانەیان بۆ بگەڕێتەوە.
عێراق توانایەکی بێوێنەی هەیە بۆ گۆڕینی هاوکێشەکانی وزە، بەڵام ئەمە بەستراوەتەوە بە سەرکەوتنی بەغدا لە کۆنترۆڵکردنی هێزە چەکدارەکاندا.
هەڵسەنگاندنی سەروەریی یاسا لە دوای ساڵی ٢٠٠٣وە
ڕۆژنامەی واشنتن تایمز ڕایگەیاندووە: "هیچ وەبەرهێنانێکی ملیار دۆلاری جێگیر نابێت ئەگەر سەروەریی یاسا و ئاسایشی گرێبەستەکان دەستەبەر نەکرێت؛ عێراق ئێستا لەبەردم تاقیکردنەوەیەکی کاریگەری دوای ساڵی ٢٠٠٣دایە کە دەرەنجامەکەی نەخشەی ئەمنی و وزەی ناوچەکە دەگۆڕێت."
پاشخانی هەوڵەکان بۆ کۆنترۆڵکردنی چەک
پرسی "چەکی دەرەوەی دەوڵەت" یەکێکە لە دۆسیە هەرە هەستیارەکانی عێراق لە دوای ساڵی ٢٠٠٣وە، کە هەمیشە وەک هەڕەشەیەک بۆ سەر دەسەڵاتی حکوومەت بینراوە. لە ئێستادا حکوومەتەکەی عەلی زەییدی هەوڵەکانی چڕ کردووەتەوە بۆ کڕینەوەی چەکی قورس و ڕێکخستنەوەی گرووپە چەکدارەکان لە ناو دامەزراوە فەرمییەکاندا. پرۆژەی "ڕێگەی گەشەپێدان" و ڕێککەوتنە نەوتییە نوێیەکان، وایان کردووە کە عێراق وەک ناوەندێکی ئابووریی جیهانی دەربکەوێت، بەڵام بوونی میلیشیاکان هەمیشە وەک مەترسییەک لەسەر ئەم پرۆژە ستراتیژییانە دەمێنێتەوە.