هەرێم نیوز
لە ڕووداوێکی دڵتەزێندا لە نەخۆشخانەیەکی ئیسلام ئابادی پایتەختی پاکستان، ئاگر لە بەشی چاودێریی کۆرپەلە کەوتەوە و لە ئەنجامدا بەلایەنی کەمەوە ١٥ کۆرپەی ساوا گیانیان لەدەست دا.
هۆکاری کەوتنەوەی ئاگرەکە
بەپێی زانیارییە سەرەتاییەکانی تیمەکانی فریاگوزاری، بەیانیی ئەمڕۆ چوارشەممە، ئاگر لە نهۆمی سێیەمی بەشی دایک و منداڵ لە نەخۆشخانەی پەیمانگای زانستە پزیشکییەکانی پاکستان (PIMS) کەوتووەتەوە. ڕوونیش کراوەتەوە کە ئاگرەکە بە دیاریکراوی لە ناو بەشی چاودێریی کۆرپەلە و بەهۆی تەقینەوەی کۆمپرێسەری ئامێرێکی ساردکەرەوەوە (سپلیت) ڕووی داوە.
کۆنتڕۆڵکردنی دۆخی شوێنی ڕووداوەکە
دەسەڵاتدارانی ئیسلام ئاباد ڕایانگەیاند، تیمەکانی بەرگریی شارستانی توانویانە ئاگرەکە بە تەواوی بکوژێننەوە و لە ئێستاشدا تیمە پزیشکی و فریاگوزارییەکان سەرقاڵی کۆنتڕۆڵکردنی بارودۆخی نەخۆشخانەکە و پێشکەشکردنی هاوکاریی پێویستن.