هەرێم نیوز
پرۆسەی دابەشکردنی مووچەی مانگی تەممووزی فەرمانبەران و مووچەخۆرانی هەرێمی کوردستان دەستی پێکرد و بڕیارە لە ماوەی سێ ڕۆژدا کۆتایی بێت، تێیدا ٩٢٢ هەزار مووچەخۆر لە ڕێگەی پرۆژەی "هەژماری من"ـەوە بە شێوەیەکی دیجیتاڵی مووچەکانیان وەردەگرن.
دەستپێکردنی دابەشکردنی مووچە و ئەو شوێنانەی مووچە وەردەگرن
ئەمڕۆ سێشەممە ١٨ی ئابی ٢٠٢٦، دابەشکردنی مووچەی مانگی تەممووز بۆ بەشێک لە وەزارەت و فەرمانگەکانی حکوومەتی هەرێمی کوردستان دەستی پێکرد. بەپێی خشتەکە، ئەمڕۆ مووچەی کەسوکاری شەهیدان و ئەنفالکراوان، زیندانیانی سیاسی و بەکەوتووانی چەکی کیمیایی، خانەنشینی شارستانی و پێشمەرگە، وەزارەتی خوێندنی باڵا و توێژینەوەی زانستی، وەزارەتی تەندروستی و وەزارەتی پەروەردە دابەش دەکرێت.
ئامارەکانی پرۆژەی "هەژماری من" بەپێی توێژ و پارێزگاکان
بەپێی ئامارەکانی پرۆژەی "هەژماری من"، ئەم مانگە ٩٢٢ هەزار مووچەخۆر لە ڕێگەی ٧١٠ ئامێری "ئەی تی ئێم"ـەوە لە سەرانسەری پارێزگاکاندا مووچەکەیان بە دیجیتاڵی وەردەگرن. لەو ژمارەیە، ٣٨٨ هەزار فەرمانبەری شارستانی، ٢٣٨ هەزار پێشمەرگە و هێزەکانی ئاسایش، ٣٧ هەزار خێزانی گیانبەختکردووان و دوو هەزار و ٢٦٠ خانەنشین لەخۆدەگرێت.
لە سەر ئاستی پارێزگاکانیش، دابەشبوونی مووچەخۆرانی پرۆژەکە بەم شێوەیەیە: ٣٩٥ هەزار لە پارێزگای هەولێر، ٣١٤ هەزار لە پارێزگای سلێمانی، ١٩٢ هەزار لە پارێزگای دهۆک و ٢١ هەزار مووچەخۆر لە پارێزگای هەڵەبجە.
دەربارەی پرۆژەی "هەژماری من"
پرۆژەی "هەژماری من" لە ساڵی ٢٠٢٣ لەلایەن مەسرور بارزانی، سەرۆکوەزیرانی هەرێمی کوردستانەوە ڕاگەیەندرا، وەک پرۆژەیەکی ستراتیجی بۆ بەدیجیتاڵکردنی مووچە، نەهێشتنی مامەڵەی کاش و بەستنەوەی مووچەخۆران بە سیستەمی بانکی سەردەمییانەوە. تا ناوەڕاستی ساڵی ٢٠٢٦ زیاتر لە ٩٥٠ هەزار فەرمانبەر لەم پرۆژەیەدا تۆمار کراون و ئامانجەکە ئەوەیە تا کۆتایی ساڵ سەرجەم مووچەخۆران ببقنە خاوەنی هەژماری بانکیی خۆیان.