هەرێم نیوز

عەلی فالح زەیدی، سەرۆک وەزیرانی عێراق ڕایگەیاند، کە لەگەڵ کشانەوەی تەواوەتیی هێزەکانی ئەمریکا لە وڵات، چیدیکە هیچ پاساوێک بۆ بوونی چەکی دەرەوەی دەوڵەت و هێزی بەرگری نامێنێت، جەختیشی کردەوە کە پەیوەندییەکانی بەغدا و واشنتن بەرەو هاوبەشیی ئابووری هەنگاو دەنێن.

ئەمڕۆ چوارشەممە، 24ـی 6ـی 2026، عەلی فالح زەیدی، سەرۆک وەزیرانی عێراق لە لێدوانێکی فەرمیدا ئاماژەی بە گۆڕانکارییە ستراتیژییەکانی وڵاتەکەی کرد لە پاش پێشهاتە سیاسی و دیپلۆماسییەکانی ئەمدواییانەی ناوچەکە و ڕایگەیاند، قۆناغی هاوکاریی سەربازیی نێوان عێراق و ویلایەتە یەکگرتووەکانی ئەمریکا کۆتایی هاتووە و لەمەودوا پەیوەندییەکان دەگۆڕدرێن بۆ هاوبەشیی ئابووری و وەبەرهێنان لە سێکتەرە جیاوازەکاندا.

سەبارەت بە دۆخی ئەمنی و چەکی چەکدارەکان، سەرۆک وەزیران بە ڕوونی ڕایگەیاند: "دوای کشانەوەی سەرجەم هێزەکانی ئەمریکا لە خاکەکەمان، هیچ پاساو و پێویستییەک بۆ هیچ جۆرە هێزێکی بەرگری یان جووڵەی چەکداری لە عێراقدا نامێنێت و پاراستنی سەروەریی وڵات تەنها لە ئەستۆی دامەزراوە شەرعی و سەربازییەکانی دەوڵەتدابێت."

عەلی فالح زەیدی لە لایەنێکی دیکەی قسەکانیدا کەرتی ئابووری و وزەی وڵاتی بەسەرکردەوە و ئاشکرای کرد، عێراق بە فەرمی داوا لە ڕێکخراوی ئۆپێک دەکات کە ئاستی بەرهەمهێنانی نەوتی وڵات زیاد بکات، بە شێوەیەک کە لەگەڵ تواناکانی کەرتی نەوت و قەبارەی گەورەی دانیشتووانی عێراقدا بگونجێت تاوەکو بتوانرێت پەرە بە ژێرخانی ئابووری بدرێت.