هەرێم نیوز

دۆناڵد ترەمپ، سەرۆکی ویلایەتە یەکگرتووەکانی ئەمریکا، بە توندی هێرش دەکاتە سەر ئەنجوومەنی پیرانی وڵاتەکەی و تۆمەتباریان دەکات بەوەی کە لە کاتێکی هەستیاردا بڕیاری بێمانایان داوە و بە سنووردارکردنی دەسەڵاتەکانی، خزمەتیان بە بەرژەوەندییەکانی تاران کردووە.

ڕەخنەی توند لە سەکۆی تروس سۆشیال؛ ئێران لە لێواری داڕماندایە

دۆناڵد ترەمپ لە پێگەی فەرمیی خۆی لە سەکۆی کۆمەڵایەتیی "تروس سۆشیال" نووسیویەتی: "لە ئێستادا کۆماری ئیسلامیی ئێران لە دۆخێکی یەکجار ناهەمواردایە و لەسەر لێواری داڕمانی تەواوەتی داکۆکێ دەکات. بۆ یەکەمین جار لە ماوەی دەیان ساڵی ڕابردوودا، تاران ئامادەیە نزیکەی هەموو شتێک پێشکەش بکات و سازشی تەواو بکات، هاوکات ڕێزێکی یەکجار زۆریش لە ئەمریکا و سەرۆکەکەی دەگرێت."

ترەمپ لە درێژەی پەیامەکەیدا نیگەرانیی قووڵی خۆی لە بڕیارەکەی کۆنگرێس دەربڕی و وتی: "ڕێک لەم کاتە زێڕین و هەستیارەدا، ئەنجوومەنی پیرانی ئەمریکا لە کاتێکی زۆر خراپ و بێمانادا بڕیاریدا دەنگ بە یاسای سنووردارکردنی دەسەڵاتی جەنگ بدات؛ بەم هەنگاوە بێباکانەیان، پشتیوانی و هاوکارییان پێشکەش بە گەورەترین دەوڵەتی پاڵپشتیکاری تیرۆر لە جیهاندا کرد و پەیامێکی وایان نارد کە ئەمریکا پێی خۆش نییە من چی بەرامبەر بەم وڵاتە دەکەم و دەبێت ڕێگریم لێ بکەن."

سەرۆکی ئەمریکا ئاماژەی بە کۆدەنگیی ناو ئەنجوومەنەکە کرد دژ بە لایەنە سەربازییەکەی و ئاشکرای کرد: "چوار سیناتۆری کۆماریی دۆڕاو چوونە پاڵ دیموکراتەکان و پێکەوە دەنگیان دژ بە دەسەڵاتەکانی من دا؛ بەم کارەشیان وایانکرد ئێرانییەکان تووشی سەرسوڕمان بن و پرسیاری ئەوە بکەن کە 'هەموو ئەم ململانێ ناوخۆییەی واشنتن مانای چییە؟'"
ترەمپ لە کۆتایی پەیامە توندەکەیدا پێداگریی لەسەر جێبەجێکردنی پلانەکانی کرد.

جەختی کردەوە: "ئەم سیناتۆرانە بە تەواوی ئەرکی دیپلۆماسی و سەربازیی منیان لەم دۆسیەیەدا قورستتر کردووە؛ بەڵام سەرەڕای هەموو ئەمانەش، هەموان دڵنیا دەکەمەوە کە دۆخەکە لە ژێر هەر بارودۆخێکدا بێت، من ئامانجەکانم بە سەرکەوتوویی بە ئەنجام دەگەیەنم، چونکە من هەمیشە و لە هەموو کاتێکدا ئەو کارە دەکەم و سەر دەکەوم!"