هەرێم نیوز
بڕیارە سبەی پەرلەمانی عێراق کۆبوونەوە ئاساییەکانی خۆی دەستپێبکاتەوە و یەکێک لە تەوەرە سەرەکییەکانیش گفتوگۆکردن دەبێت لەسەر پڕۆژەیاسای "سەربازیکردنی ناچاری" بۆ گەنجان.
دەستپێکردنەوەی دانیشتنەکان:
بەپێی فەرمانگەی ڕاگەیاندنی پەرلەمانی عێراق، بڕیارە لە سبەینێ یەکشەممە، ١٩ی نیسانی ٢٠٢٦، دانیشتنەکان دەستپێبکەنەوە و بۆ ماوەی چوار ڕۆژ (تا ٢٣ی نیسان) بەردەوام بن. لەم کۆبوونەوانەدا خوێندنەوەی یەکەم بۆ هەشت پێشنیازەیاسا دەکرێت.
خزمەتی سەربازیی ناچاری:
یەکێک لە گرنگترین ئەو یاسایانەی گفتوگۆی لەسەر دەکرێت، پێشنیازەیاسای خزمەتی سەربازیی ناچارییە. ئەم پڕۆژەیە لەلایەن لیژنەی ئاسایش و بەرگریی پەرلەمانەوە ئامادەکراوە و لە ٦٦ بڕگە پێکهاتووە. ئامانج لێی گەڕاندنەوەی گەنجانە بۆ ناو ڕیزەکانی سوپا بە شێوەیەکی ناچاری.
بژاردەیەکی ستراتیژی:
ئەم هەنگاوە دوای ئەوە دێت کە لە ١٥ی ئەم مانگەدا، هەیبەت حەلبووسی، سەرۆکی پەرلەمانی عێراق سەردانی وەزارەتی بەرگری کرد و لەگەڵ سوپاسالاری عێراق کۆبووەوە. لەو کۆبوونەوەیەدا هەردوولا خزمەتی سەربازیی ناچارییان بە "بژاردەیەکی ستراتیژی" وەسف کرد بۆ بەهێزکردنی تواناکانی سوپا و دروستکردنی بنکەیەکی مرۆیی بۆ هەڵگرتنی بەرپرسیارێتی نیشتمانی.
گەڕانەوەی سەربازیی ناچاری لە عێراق، کە ساڵانێکی زۆرە پەکخراوە، یەکێکە لەو بابەتانەی مشتومڕێکی زۆری لەنێوان لایەنە سیاسییەکان و شەقامی عێراقیدا دروست کردووە، بەتایبەت لە ڕووی بودجە و شێوازی جێبەجێکردنیەوە.