هەرێم نیوز
بەڕێوەبەرایەتیی پۆلیسی پارێزگای هەولێر ڕایگەیاند، ئەمڕۆ دووشەممە ١٦ی ئازاری ٢٠٢٦، توانراوە تۆمەتباری سەرەکیی کوشتنی مامۆستایەکی زانکۆ دەستگیربکرێت کە دوای تاوانەکە بەرەو پارێزگای دیالە هەڵاتبوو.
ڕووداوەکە لە گەڕەکی (ئاری - شۆڕش) لە شاری هەولێر دەستیپێکرد، کاتێک ئاگر لە ماڵێک کەوتەوە و دوای گەیشتنی تیمەکان دەرکەوت مامۆستایەکی زانکۆ بەناوی (دکتۆر دلێر ساڵح)، سەرۆکی بەشی کۆمپیوتەر لە زانکۆی سەڵاحەددین، کوژراوە و دواتر تەرمەکەی و ماڵەکەی سوتێنراون.
بەپێی لێکۆڵینەوەکانی پۆلیس، تۆمەتبارەکە ناوی (ز. ع. ح. ع) و خەڵکی دیالەیە، دوای کوشتنی دکتۆر دلێر ئۆتۆمبێلەکەی بردووە و کاتژمێر ١٢:٣٩ خولەکی نیوەڕۆ هەولێری جێهێشتووە.
پۆلیسی هەولێر ئاماژەی بەوەش کردووە، دوای هەماهەنگی لەگەڵ وەزارەتی ناوخۆی فیدراڵ و پۆلیسی کەرکووک و دیالە، کاتژمێر ٥:٣٠ خولەکی ئێوارەی ئەمڕۆ تۆمەتبارەکە لە بازگەی (خان بەنی سەعد) لە دیالە دەستگیرکرا و ڕادەستی دادگا دەکرێت.