هەرێم نیوز
وەزارەتی دەرەوەی ئێران هێرشێکی توند دەکاتە سەر دۆناڵد ترەمپ و بە "درۆزنێکی پیشەگەر" ناوی دەبات. تاران ڕایگەیاند کە واشنتن و ئیسرائیل ستراتیژیی "شەیتانیکردنی ئێران" پەیڕەو دەکەن و تەواوی ئەو زانیارییانەی لەبارەی مووشەکی کیشوەرەبڕ و بەرنامەی ئەتۆمییەوە دەوترێن، بە "درۆی گەورە" وەسف دەکات.
ئیسماعیل بەقایی، وتەبێژی وەزارەتی دەرەوەی ئێران، لە یەکەم کاردانەوەیدا بەرامبەر گوتارەکەی دۆناڵد ترەمپ، ڕایگەیاند کە سەرۆکی ئەمریکا لێهاتووییەکی تایبەتی هەیە لە "هەڵبەستنی ڕاستی ساختەدا". بەقایی وتی: "ترەمپ بنەمایەکی وەزیری پڕوپاگەندەی نازییەکان (جۆزێف گۆبڵز) بەکاردەهێنێت کە دەڵێت: درۆیەک هێندە دووبارە بکەرەوە تا دەبێتە ڕاستی."
تهوهره سهرهكییهكانی وهڵامهكهی تاران:
١. ڕەتکردنەوەی هەڕەشەی مووشەکی:
وتەبێژی وەزارەتی دەرەوەی ئێران جەختی کردەوە کە ئەو بانگەشانەی سەبارەت بە مووشەکی بالیستیی کیشوەرەبڕ و بەرنامەی ئەتۆمی دەکرێن، تەنها زنجیرەیەک "درۆی نابەجێن" و ئامانج لێی چەواشەکردنی ڕای گشتیی جیهانە.
٢. شەڕی زانیاری و "شەیتانیکردن":
بەقایی ئاماژەی بەوە دا کە حکومەتی ئەمریکا و ئیسرائیل بە شێوەیەکی سیستماتیک کار دەکەن بۆ بڵاوکردنەوەی زانیاریی ناڕاست دژی گەلی ئێران. هەروەها ئامارەکانی قوربانیانی ناڕەزایەتییەکانی مانگی کانوونی دووەمی بە بەشێک لەو هەڵمەتە پڕوپاگەندەییە ناوزەند کرد.
٣. ململانێ لەسەر "ڕستە گەورەکە":
ئەم وەڵامەی تاران دوای ئەوە دێت کە ترەمپ ڕایگەیاندبوو ئێرانییەکان "ترسناکن" و خەریکی بنیاتنانەوەی بەرنامە ئەتۆمییەکەیانن. ترەمپ مەرجی ڕێککەوتنی بەوە بەستبووەوە کە تاران بڵێت: "ئێمە چەکی ئەتۆمیمان ناوێت"، بەڵام تاران دەڵێت ئەم قسانە تەنها بۆ زیاتر فشار خستنە سەر وڵاتەکەیانە.