هەرێم نیوز
گۆڤاری ئەتلانتیک لە شیکردنەوەیەکی نوێدا ئاماژە بەوە دەکات کە سەرەڕای هەڕەشە زۆر توندەکانی دۆناڵد ترەمپ بۆ بەکارهێنانی هێزی سەربازی دژی ئێران، بەڵام واشنتۆن هێشتا بژاردەی دیپلۆماسی وەک رێگەیەکی سەرەکی هێشتووەتەوە. ترەمپ کە مانگی رابردوو هۆشداری دابوو کە کات خەریکە تەواو دەبێت و ئەگەر ئێران نەگەڕێتەوە بۆ سەر مێزی گفتوگۆ رووبەڕووی وەڵامێکی "خێرا و توندوتیژ" دەبێتەوە، ئێستا دەڵێت "هیچ پەلەیەکی نییە" بۆ گەیشتن بە رێککەوتن، ئەمەش نیشانەی گۆڕانکارییە لە تاکتیکی فشارەکانیدا.
بەپێی راپۆرتەکە، بەرپرسانی ئەمریکی تاوتوێی چەندین بژاردەی سەربازییان کردووە، لەوانە لێدان لە دامەزراوە ئەتۆمییەکان و بە ئامانجگرتنی سەرکردە باڵاکان، بەڵام هەڵسەنگاندنە ناوخۆییەکانی پنتاگۆن دەریانخستووە کە ئەنجامدانی ئۆپەراسیۆنێکی گەورە بێ زیان گەیاندن بە هێزەکانی ئەمریکا و تێکدانی سەقامگیری ناوچەکە کارێکی ئاسان نییە.
ئەتلانتیک دەنووسێت کە بەپێچەوانەی پڕوپاگەندەکانی ترەمپ دەربارەی (کۆمەڵە کەشتیی جەنگی زەبەلاح)، ئەمریکا لە ئێستادا کەشتی و فڕۆکەی پێویستی لە ناوچەکەدا نییە بۆ جەنگێکی درێژخایەن و تەنانەت ئامانجە سەربازییەکانیش بۆ فەرماندەکان بە روونی دیاری نەکراون.
لە لایەکی ترەوە، بۆ یەکەمجار لە دوای ساڵی ڕابردووەوە، هەردوو وڵات لە عومان دەستیان بە گفتوگۆی ناڕاستەوخۆ کردووەتەوە.
ئامادەبوونی "براد کوپر" فەرماندەی باڵای سێنتکۆم لەم گفتوگۆیانەدا وەک پەیامێکی سەربازی لێکدەدرێتەوە، هەرچەندە واشنتۆن هێشتا گومانی هەیە کە ئایا تاران بە راستی رێککەوتنی دەوێت یان تەنها دەیەوێت کات بکوژێت بۆ کەمکردنەوەی فشارە ئابوورییەکان.
ستراتیژی ترەمپ ئەوەیە کە هەموو تواناکانی ئێران بۆ زیندووکردنەوەی بەرنامە ئەتۆمییەکەی لەناو ببات، لە کاتێکدا ئێران ئامادە نییە لەسەر پرسی مووشەکی و هێزە بریکارەکانی لە ناوچەکەدا سازش بکات.
یەکێکی تر لە هۆکارەکانی سڵکردنەوە لە بژاردەی سەربازی، توانای مووشەکی و درۆنەکانی ئێرانە کە دەتوانن بنکەکانی ئەمریکا و هاوپەیمانەکانی بکەنە ئامانج.
هەروەها وڵاتانی وەک سعوودییە و ئیمارات بە راشکاوی بە واشنتۆنیان وتووە کە نایانەوێت تێوەگلانی جەنگێکی هەرێمی ببن.
داخستنی گەرووی هورمزیش، کە 20٪ی نەوتی جیهانی تێدا تێپەڕ دەبێت، مەترسییەکی گەورەی ئابوورییە کە ترەمپ ناتوانێت پشتگوێی بخات.
لە کۆتاییدا، ئەتلانتیک دەڵێت ئەگەرچی ترەمپ و نەتانیاهۆ لەسەر هەموو وردەکارییەکان هاوڕا نین، بەڵام هەردوولا لەوەدا یەکن کە بەرەیەکی یەکگرتوو دژی تاران نیشان بدەن.
پرسیارە سەرەکییەکە ئەوەیە کە ئایا ترەمپ تا کەی چاوەڕێی دیپلۆماسی دەکات پێش ئەوەی پەنا بۆ "کارە سەختەکە" ببات، بەتایبەت کە مانەوەی هێزەکانی ئەمریکا لە ناوچەکەدا بێ ئەنجامدانی هیچ کارێک، کاتی زیاتر بە تاران دەدات بۆ ئامادەکاری سەربازی.