هەرێم نیوز
بارەگای بارزانی ڕاگەیەندراوێکی فەرمی لەبارەی ناوەرۆکی پەیوەندییە تەلەفۆنییەکەی دوێنێ شەوی سەرۆک مەسعوود بارزانی و ئەحمەد شەرع، سەرۆکی سووریا بڵاوکردەوە و تێیدا تیشک دەخرێتە سەر هەنگاوەکانی داهاتووی ناوچەکە.
لە ڕاگەیەندراوەکەی بارەگای بارزانیدا هاتووە، لەو پەیوەندییە تەلەفۆنییەدا هەردوولا جەختیان لەوە کردووەتەوە کە "دیالۆگ و لێکتێگەیشتن تەنیا ڕێگەی چارەسەرکردنی کێشە و ناکۆکییەکان بێت". ئەمەش وەک ئاماژەیەک بۆ دوورکەوتنەوە لە بژاردەی سەربازی و پەنابردن بۆ مێزی گفتوگۆ لە سووریای نوێدا لێک دەدرێتەوە.
بەشێکی سەرەکیی گفتوگۆکە تەرخانکراوە بۆ بارودۆخی سووریا و دوایین گۆڕانکارییەکان، بەتایبەتی ڕێککەوتنی نێوان حکوومەتی سووریا و هێزەکانی سووریای دیموکرات (هەسەدە). هەردوولا باسیان لە هەنگاوەکانی داهاتوو کردووە بۆ ئەوەی ڕێککەوتنەکە بچێتە بواری جێبەجێکردنەوە.
لە کۆتایی ڕاگەیەندراوەکەدا هاتووە کە هەردوولا دووپاتیان کردووەتەوە کە پێویستە ئاشتی و سەقامگیری لە تەواوی سووریادا بەرقەرار بێت، بە شێوەیەک کە بەرژەوەندیی سەرجەم پێکهاتەکان بپارێزرێت و کۆتایی بە ئاڵۆزییەکان بهێنرێت.