هێمن عەبدولقادر

محمد ڕەسوڵ هاوار لە بیرەوەریەکانیدا دەڵێت :-
وەختی خۆی بیست ، سی ، ئەسپ سوار ئەچن بۆلای مەحمود پاشای جاف بۆ دیدەنی ، لەڕێگا ئەگەنە سەر خەرمانێك و ئەیانەوێت تورەکەکانیان لە خەرمانەکە پڕ بکەن لە کاو جۆ بۆ وڵاغەکانیان ، بەڵام هیچیان لەبەر لووت بەرزی دانابەزن و هەر کەسە و تورەکەکەی فڕێ دەداتە سەر خەرمانەکە و بەوی تر دەڵێت ئا دابەزە ئەو تورەکانە پڕ بکە، سەرەنجام هیچ کامیان لەبەر لوتبەرزی دانابەزن و وڵاغەکانیان بە برسێتی ئەهێڵنەوە و تورەکەکانیش لەوێ جێدەهێڵن و دەڕۆن.
......................
ئەگەر بە پیادە یان بە ماشێن پیاسەیەکی گوندەکانی کوردستان بکەیت لەسەر ڕیگاکان تابلۆی گەورە دەبینیت نوسراوە (گوندی فڵانی خواروو) و (گوندی فڵانی سەروو) ئەمە دەرهاویشتەی ئەوەبووە کە هیچ کەسێک سازشی تەنانەت بۆ خزم و براکەی خۆی نەکردووە ، لە شوێنێکی چۆڵیشدا تەنانەت نەیانتوانیوە پێکەوە ئیدارە بکەن و بەئاشتی بژین
کە ئەچیت بۆ سەیران ، ئەو دەڵێت ماڵی فڵان بێت من نایەم ، کە ئەچین بۆ حەفلە ئەو ئەڵێت ئەو جلە لەبەر بکەیت من نایەم تەنها من با لەبەرما بێت و تاک بم ، هەمووی خۆی بە پاشا زانیووە (پاشای دکت ، پاشای تیکتۆک ، پاشای برنج ، پاشای حادیسە ، پاشای نووسین ، پاشای ئەکادیمی ، پاشای شەڕەجنێو ، پاشای غەم و .. هتد )
هیچ ناوێکمان نییە بەناوی (پاشای لێبووردن ، پاشای پێکەوەژیان ، پاشای قبوڵکردن ، پاشای سازش ، پاشای قوربانی ، پاشای بەزەیی)
.........................
خوا بۆیە داری بەرزکردۆتەوە بۆ ئەوەی چۆلەکەی بەسەرەوە بنیشێتەوە ، خۆ ئەگەر شوێنی بەرز نەبووایە چۆلەکە بەو بچووکیە ئەبوو بەژێر دەست و پێوە ، خودا بۆیە ئێمەی بچوککردۆتەوە لەسەر دارەوە تەماشای یەکتری دەکەین، هەموومان ئەوانی تر بە بچوکتر ، بەردەستر ، سەپان و پاڵە و خزمەتکار و وەرزێر دەزانین.
قسەی ڕۆژهەڵاتناسەکانی وەک (مینۆریسکی ، ئیدمۆنز و نیکتین و ڤان پرۆسین مەکداوڵ و تۆماس بوا و میستەر ڕیچ و ئەوانی تر) واز لێبهێنن دەزانم هەموومان دەڵێین ئەوانە دژی کورد بوون، بەڵام وەرن دیقەت بدەن لە ئێستادا
بەدەگمەن دوو نووسەری کورد ، دو ئەکادیمیست ، دوو سیاسی ،دوو خوێنەوار و ڕۆشنبیری کورد ، دوو پسپۆڕ ئەبینیت ددانی خێر بەیەکتریدا بنێن.
حاجی قادری کۆیی گوتەنی :-
(بۆ ئەمیرانی غەیرە دەبنە گزیر
نەک لە خۆیان یەکێکی بێتە ئەمیر)
تورەکەی دونیا پڕ ئەکەن ، بەڵام بەو مەرجەی تورەکەی برایەک کەسێک، هاوخوێنێکی خۆیان نەبێت بۆ دونیا دەبنە خراپەکار و گزیر بەڵام بەو مەرجەی پاشا و وەزیر لە خۆیان نەبێت
نوقتە سەری دێڕ ...
.................................
هاوپێچ وێنەی پاشای حادیسە لەسەر شەقام ، چونکە پیکاب هەموو گیانی ئاسنە و (ئێم جی) و (بی وایدی ) و(سەنی) و (کامری) بەدبەخت فایبەرگڵاس و تەنەکەن ، ئەوەتا خۆی ناو ناوە پاشای حادیسە و شەقام ، جا پیکاب لەهەر شوێنێکەوە بەری کەویت وەکو ئەوە وایە تمەنت کڕیبێت هەر لەزەرەرایت .
شکستی سیاسیمان ، بەرەنجامی شکستی کۆمەڵایەتیمانە ،
ناتوانین لە هیچ ڕووداوێکی گەورەی دونیای ئێمە بڕوانین ، ئەگەر لە کڵاو ڕۆژنەی کۆمەڵایەتییەوە لێی نەڕوانین ، ئێمە کۆمەڵگایەکی بچڕاو و پەرتەوازەین ، هیچ شتێک ناتوانێت کۆمان بکاتەوە ، بەڵام بچوکترین شت دەتوانێت بڵاومان بکاتەوە بمانکات بە دووژمنی یەکتری ، بمانکات بە خان و ئاغا و دەرەبەگ و گەورە و پاشای یەکتری.