هەرێم نیوز
داوا دەكرێت سروە عەبدولواحید, سەرۆکی فراکسیۆنی نەوەی نوێ لە پەرلەمانی عێراق بە تاوانی تۆمەتهەڵبەستن پاڵپشت بە ماددەی 433 لە یاسای سزاكانی عێراقی، لەبەردەم دادگا ئامادە بێت.
سروە عەبدولواحید بەپێی مادەی 433 لە یاسای سزادانی عێراقی، بانگهێشتی بەردەم دادگا كراوە كە ناوەڕۆكەكەی باس لە بوونی "بوختانكردن و تۆمەتهەڵبەستن" دەكات، سزای ئەو تاوانەش گرتن و پێبژاردن یان یەكێك لەو دوو سزایەیە.
ئەو ماددە یاساییەی كە دۆسیەی لە دژی پەرلەمانتار سروە عەبدولواحیدی پێ كراوەتەوە، ماددە 433 ـی یاسای سزاكانی عێراقیە كە باس لە تاوانی تۆمەتهەڵبەستن بە ناڕەوا دەكات بەشێوەیەكی ئاشكرا بۆ ڕای گشتی، بەبێ بوونی بەڵگەیەكی ڕاست و دروست، كە زیانی دەروونی و مەعنەوی بە كەسی تۆمەت بۆهەڵبەستراو دەگەیێنێت و سزاكەی گرتن و پێبژاردن یاخود یەكێك لەو دوو جۆرە سزایەیە.
ئەوە لە كاتێكدایە كە شەوی 12ی 8ی 2025، هێزە تەناهییەكانی سلێمانی، شاسوار عەبدولواحید سەرۆكی جووڵانەوەی نەوەی نوێیان گرت و تا ئێستەیش لە گرتووخانەیە، بڕیارە لە 2ی9 دادگاییكردنی بەڕێوە بچێت.
