هەرێم نیوز
بەپێی نووسینگەی بنیامین نەتانیاهۆ، کابینەی ئەمنی ئیسرائیل ڕەزامەندی دەربڕیوە لەسەر داگیرکردنی کەرتی غەززە. هەروەها لەسەر پێنج بنەمای دیکە بۆ کۆتایی هێنان بە شەڕەکە ڕێککەوتوون، لەوانە چەکداماڵینی حەماس، گەڕانەوەی هەموو بارمتەکان، بە مردوو یان زیندوو، هەروەها کۆنترۆڵی ئەمنی ئیسرائیل بەسەر کەرتی غەززەدا.
ئەم ڕێککەوتنە دوای چەند کاتژمێرێک گفتوگۆ لە کۆبوونەوەی کابینەی ئەمنی نەتانیاهۆدا کرا.
ئەو پلانە لەلایەن ئیال زەمیر، سەرۆکی ئەرکانی هێزی ئاسمانی نێودەوڵەتییەوە دژایەتی کرا و وتی: ئەم پلانە ژیانی سەرباز و بارمتەکان دەخاتە مەترسییەوە.
کابینەی ئەمنی ئیسرائیل بە زۆرینەی دەنگ پێنج پرەنسیپی کۆتایی هێنان بە شەڕەکەی پەسەند کرد: چەکداماڵینی حەماس، گەڕاندنەوەی هەموو بارمتەکان (زیندوو و مردوو)، چەکداماڵینی کەرتی غەززە، پاراستنی کۆنترۆڵی ئەمنی ئیسرائیل بەسەر کەرتی غەززە و دامەزراندنی ئیدارەیەکی مەدەنی بەدیل کە نە پەیوەندی بە حەماسەوە هەبێت و نە بە دەسەڵاتی فەلەستین.
هەروەها ئەم کۆبوونەوەیە ناڕەزایەتی لە چەند شارێکی ئیسرائیلی لێکەوتەوە.
پێشتر سەرۆکوەزیرانی ئیسرائیل لە کۆبوونەوەیەکدا لەگەڵ کابینەی ئەمنیی وڵاتەکەی ڕایگەیاندبوو کە بەنیازە هەموو غەززە کۆنترۆڵبکات، بەڵام ”نایەوێت دەستی بەسەردا بگرێت”.
بەڵام بزووتنەوەی حەماس وەڵامی دایەوە و وتی: نەتانیاهۆ هەوڵی خزمەتکردنی بەرژەوەندییەکانی خۆی دەدات و بارمتەکان "دەکاتە قوربانی".
دانوستانەکان شەوی ڕابردوو دەستی پێکرد و تا بەرەبەیانی هەینی بەردەوام بوو. دەوترێت بەپێی پلانی نەتانیاهۆ، سەرەتا گرنگی بە شاری غەززە دەدرێت، هەروەها ملیۆنێک لە دانیشتووانی ئەو شارە بەرەو باشوور دەگوازرێنەوە.