هەرێم نیوز
کەناڵی ئەلعەرەبیە ڕایگەیاند، حکومەتی لوبنان هێڵکاری گشتی پلانی ئەمریکا بۆ داماڵینی چەکی حیزبوڵڵای پەسەند کردووە. وەزیری دادی لوبنان دوای کۆتایی هاتنی کۆبوونەوەی ئەنجومەنی وەزیران ڕایگەیاند کە حکومەتەکەی ئەو ئامانجانەی پەسەند کردووە کە لە نامەکەی نوێنەری تایبەتی ئەمریکادا ئاماژەی پێکراوە.
ئەمریکا پلانێکی فەرمی پێشکەش بە حکومەتی لوبنان کرد و بەپێی ئەو پلانە تا کۆتایی ئەمساڵ چەکداماڵینی حیزبوڵڵا و ئۆپەراسیۆنە سەربازییەکانی ئیسرائیل لەسەر خاکی لوبنان ڕادەگیرێت و هێزەکانی ئیسرائیلیش لە پێنج پێگەی باشووری لوبنان دەکشێنەوە.
بەپێی ئاژانسی ڕۆیتەرز، پلانەکە لەلایەن تۆم باراک، نوێنەری تایبەتی دۆناڵد ترەمپ بۆ ناوچەکە پێشکەشکراوە.
ئەم پێشنیازە وردترین نەخشەڕێگای ئەمریکایە بۆ چەکداماڵینی حیزبوڵڵا لە دوای شەڕی ساڵی ڕابردوو لەگەڵ ئیسرائیل. حیزبوڵڵا تا ئێستا بانگەوازەکانی داماڵینی چەکی ڕەتکردۆتەوە.
پێشتر عەباس عێراقچی وەزیری دەرەوەی ئێران لە چاوپێکەوتنێکدا لەگەڵ میدیای فەرمی وڵاتەکەیان ڕایگەیاندبوو: حیزبوڵڵا چەکداماڵین قبوڵ ناکات، هەڵوێستی پتەوی ڕێبەری حیزبوڵڵا و دەرکردنی بەیاننامەیەکی بەهێز نیشانی دا کە حیزبوڵڵا لەسەر ئەم پرسە پتەو دەبێت.
لە بەرامبەریشدا وەزارەتی دەرەوەی لوبنان ئەم هەڵوێستەی ئێرانی ئیدانە کرد.