هەرێم نیوز
پۆلیسی دارستان و ژینگەی سلێمانی دەڵێت، شەوی ڕابردوو ئاگرێکی ڕووبەر فراوان لە سنوری گوندەکانی (چنارە + باساک) کەوتەوە .
بەڕێوەبەرایەتی پۆلیسی دارستان و ژینگەی سلێمانی لە بڵاوکراوەیەکدا ڕایگەیاند، لەگەڵ زانینی هەواڵی کەوتنەوەی ئاگرەکە دەست بەجێ مەفرەزەکانی بنکەی پۆلیسی دارستان و ژینگەی بەرزنجە گەیشتنە شوێنی ڕووداوەکە و بە هاوکاری و هەماهەنگی لەگەڵ دانشتیوانی گوندەکان و خەمخۆران و دڵسۆزانی ژینگە سەرەڕای دژواری شوێنەکە بەڵام بەهەوڵی هەمووان توانرا ئاگرەکە کۆنترۆڵ بکرێت .
باسی لەوەشکرد، بەپێی دەرئەنجامە سەرەتاییەکان پێشبینی دەکرێت نزیکەی (٥٠٠) پێنج سەد دۆنم لە پوش و پاوان و دارستانی سروشتی سوتابێت .
ئەوەشی خستەڕوو، لەلایەن بنکەی پۆلیسی دارستان و ژینگەی بەرزنجە لێکۆڵینەوەی خێرا دەستی پێکرد و توانرا تۆمەتبارێک بەهۆکاری کەوتنەوەی ئاگرەکە دەستگیربکرێت لێکۆڵینەوەکان بەردەوامیان دەبێت .
گووتی، لەئێستادا پەڕاوی لێکۆڵینەوەی بۆ ڕێکخراوە بۆ وەرگرتنی ڕێکاری یاسایی لەلایەن بەڕێز دادوەری لێکۆڵینەوە.