هەرێم نیوز
وەزارەتى ناوخۆى عێراق رایگەیاند، بەهۆى ئەنجامدانى کۆبوونەوەى لوتکەى عەرەبى لە باغداى پایتەخت، لە سبەینێوە تا 20ى ئەم مانگە هەموو خۆپیشاندانێک قەدەغەدەکرێت.
وەزارەتى ناوخۆى عێراق رایگەیاندووە، لە سبەینێوە تاوەکو رۆژی 20ى ئەم مانگە، خۆپیشاندان و نارەزایی قەدەغەیە و هەرکەسێک بەهەرهۆکارێک خۆپیشاندان بکات دەستگیر دەکرێت.
وەزارەتەکە راشیگەیاندووە، هێزە ئەمنییەکان هەموو تواناکانی خۆیان خستووەتەگەڕ بۆ ئامادەکاریی لوتکەی عەرەبی، بۆیە هەموو جۆرە لێپێچینەوەیەکی یاسایی بەرامبەر بەهەر خۆپیشاندەرێک دەگرنەبەر هەوڵبدات ئەرکەکانیان تێکبدات.
هه‌ینی، 9ـی ئایاری 2025، فەرماندەیی ئۆپەراسیۆنە هاوبەشەکانی عێراق فەرمانێکی دەرکرد كه لە سەرەتای هەفتەی داهاتووەوە تەواوی هێزی دامەزراوە ئەمنی و سەربازییەکان دەخرێنە ئەوپەڕی ئامادەیی لە جۆری جیم.
سەرچاوەیەکی ئەمنی وردەکارییەکانی ئاشکرا کرد و ئاماژەی دا، ئەو بارە لە ناکاو و ئامادەییەی بۆ سەرجەم هێزە ئەمنی و سەربازییەکانی عێراق دەرکراوە، پەیوەندیی بە پاراستنی ئاسایشیی لووتکەی کۆمکاری عەرەبییەوە هه‌یه، کە بڕیارە یەکشەممە، 11ـی ئەم مانگە لە بەغدا بەڕێوە بچێت.