هەرێم نیوز

وەزیری دەرەوەی عێراق رایدەگەیەنێت “تائێستا هیچ هەڕەشەیەکمان لە ترەمپەوە بەرامبەر عێراق نەبیستووە”.

 فوئاد حوسێن، وەزیری دەرەوەی عێراق، لەبارەی سیاسەتی دەرەوەی وڵاته‌كه‌ی، لە كۆنفرانسێكی ڕۆژنامەوانیدا وتی: ئیدارەی نوێی ئەمەریکا هەڕەشە نییە بۆ سەر عێراق.

هه‌روه‌ها لەبارەی پەیوەندیی نێوان عێراق و ئێران، ئاماژەی بەوە کرد،" عێراق و ئێران یەک پاکێج نین، ڕاستە دوو دراوسێی نزیکین و چەندین پەیوەندیی بازرگانی، فەرەهەنگی، مێژوویی و کۆمەڵایەتییمان بەیه‌کەوە هەیە، بەڵام دوو دەوڵەتی جیاوازین".

باسی لەوەشکرد،”پەیوەندییەکانمان لەگەڵ وڵاتانی رۆژئاوا بەهێزە، گەڕی پێنجەمی گفتوگۆی ستراتیژی لەگەڵ ئەمریکا فراوان دەبێت و چەند لیژنەیەک لەخۆدەگرێت”.

راشیگەیاند: بە ڕاشکاوی بە ئێرانمان گوتووە، پەیوەندی ئێمە لەگەڵ ئەمریکا بۆ عێراق و  ئەمەریکا پێویستە.

وتیشی،”باشترکردنی پەیوەندییەکان لەگەڵ وڵاتانی دراوسێ بنەمایەکی بنەڕەتییە، نێوەندگیریی عێراق لە نێوان سعودیە و ئێران کاریگەریی ئەرێنی لەسەر ناوخۆی عێراق هەبووە، ئاسایشی عێراق پەیوەستە بە ئاسایشی ناوچەکەوە”.

فوئاد حسێن، وەزیری دەرەوەی عێراق ئەوەشی وت، “پەیوەندییە ئابورییەکانی عێراق لەگەڵ چین گەیشتووەتە 50 ملیار دۆلار”.