هەرێم نیوز
وەزارەتی ناوخۆی عێراق ڕایگەیاند، دوای سەری ساڵ کێشەی ئۆتۆمبێلە بێ سەرەتاكان چارەسەر دەکەن و ڕێگەنادەن خاوەنەکانیان زیان بکەن.
دارا سێکانیانی، ئەندامی پەرلەمانی عێراق نووسراوێک ئاڕاستەی وەزارەتی ناوخۆی حکومەتی عێراقی فیدڕاڵ دەکات بەمەبەستی چارەسەرکردنی کێشەی ئۆتۆمبیلە بێ سەرەتاکان.
دارا سێكانیانی لە لێدوانيکدا ڕایگەیاند، لە نووسراوەكەیدا بۆ وەزارەتی ناوخۆی فیدڕاڵی ئاماژەی بەوەداوە، ئەو ئۆتۆمبێلانە ئێستا لەلایەن حکومەتی هەرێمی کوردستانەوە بڕیاری دەستبەسەراگرتنیان بۆ دەرچووە، بەهۆی ئەوەی کە مەرجیان تیانیە تا تۆماربکرێن لە لایەن بەڕێوبەرایەتی گشتی هاتووچۆوە.
باسی لەوەشکرد، ئەو ئۆتۆمبێلانە لە ڕێگای خاڵە سنورییەکانەوە هاتونەتە ناو عێراق و هەرێمی کوردستان، ڕێگایان پێدراوە هەندێک کەس و کۆمپانیا و بازرگان سوومەند بوون لە کاتێکدا خاوەنی ئێستایان هیچ تاوانێکیان نییە، چونکە ڕێگادراوە بێنە ناو عێراق و هەرێمەوە.
ئاشکراشیکرد، پێویستە حکومەتی عێراقی فیدڕاڵ بەهەماهەنکی لەگەڵ حکومەتی هەرێمی کوردستان چارەسەری ئەو کێشەیە بکەن تا خاوەنەکانیان زیان نەکەن، چونکە بە ئاگاداری لایەنە بەرپرس و پەیوەندیدارەکان هێنراونەتە ناو عێراق و هەرێمەوە.