هەرێم نیوز

نرخی ئەمپێری کارەبای موەلیدە لە دهۆک، سلێمانی و هەڵەبجە کەمترە لە 10 هەزار دینار. لە هەولێریش لە چەند گەڕەکێک لە 10 هەزار دینار کەمترە و لە هەندێک گەڕەکیش زیاترە.

لە سلێمانی و هەڵەبجە یەک ئەمپێر نزیکەی 7500 دینار دەبێت؛ لە دهۆک نزیکەی 9500 دینار و لە هەولێریش لە 8750 دینارەوە دەستپێدەکات.

خۆران خۆرانی، سەرۆکی ئەنجوومەنی موەلیدە ئەهلییەکانی هەولێر رایگەیاند، "کاتژمێرەکانی کارکردنی موەلیدە لەنێو شار 205 کاتژمێر بۆ 298 کاتژمێر بووە، هەربۆیە نرخی ئەمپێر لەنێوان 8 هەزار و 750 دینار بۆ 12 هەزار و 750 دیناردایە."

خۆران خۆرانی وتیشی، "چەند موەلیدەیەکی کەم کاری زیاتریان کردووە و نرخی ئەمپێریان دەگاتە 13 هەزار دینار؛ هەروەها لە دەوروبەری هەولێر نرخی ئەمپێرێک موەلیدە لەنێوان 6 هەزار بۆ 13 هەزار و 500 دیناردایە."

هەروەها عوسمان محەممەد، سەرۆکی کۆمەڵەی موەلیدە ئەهلییەکانی سلێمانی رایگەیاندووە، لە سلێمانی بۆ مانگی 10 نرخی ئەمپێرێک موەلیدە لەنێوان 6 هەزار بۆ 7 هەزار و 500 دیناردایە.

لەبارەی نرخی ئەمپێری کارەبای موەلیدە لە دهۆک، هەکار هرووری، بەرپرسی لیژنەی موەلیدە ئەهلییەکانی دهۆک رایگەیاند، "نرخی ئەمپێری موەلیدە بۆ مانگی 10 لە نزیک 9 هەزار و 500 دینار دەبێت."

بەگوێرەی زانیارییەکان، لە هەڵەبجەش بۆ مانگی 10 نرخی ئەمپێرێک موەلیدە هاوشێوەی سلێمانی لەنێوان 6 هەزار بۆ 7 هەزار و 500 دیناردا دەبێت.

ئەمە لەكاتێكدایە، نرخی ئەمپێری كارەبای مۆلیدە ئەهلییەکان لە هەولێر بۆ مانگی 9ی 2024، بۆ هەر ئەمپێرێك كارەبا كەمترینی 13 هەزار و 750 دینار و زۆرترینیشی 16 هەزار و 750 دینار بوو.