هەرێم نیوز
گوتەبێژی سوپای ئیسرائیل ڕایدەگەیەنێت، سوپای ئیسرائیل ڕۆژی دووشەممە تونێلێکی 800 مەتری لە باشووری لوبنان دۆزیوەتەوە، کە وەک بارەگای فەرماندەیی هێزی ڕەزوانی حزبوڵای لوبنان بەکار هێنراوە.
بەگوێرەی ڕۆژنامەیەکی ئیسرائیلی "تونێلەکە، مووشەکی دژە فڕۆکە و تەقەمەنی و ماتۆڕسکیل و خواردەمەنی و چێشتخانە و شوێنی حەوانەوەی تێدا بووە".
سوپای ئیسرائیل ڕاشیگەیاند: "هێزی ڕەزوان بە نیاز بووە ئەو چەک و کەلوپەلانە وەک بەشێک لە پلانی چوونە ناو جەلیل بەکار بهێنێت".
ئاماژەی بەوەشدا: "کاتێک سەربازەکان گەیشتوونەتە تونێلەکە، کوپێک قاوەیان دۆزیەوەتەوە کە هێشتا گەرم بووە".
ئەوەشی خستەڕوو "ئامانجی ئۆپەراسیۆنەکانمان لە لوبنان، نەهێشتنی تواناکانی حزبوڵلا و دەستەبەرکردنی گەڕانەوەی سەلامەتیی دەیان هەزار کەسی ئاوارەی لە باکووری ئیسرائیلە، بەهۆی هێرشەکانی ئەو حزبە لە لوبنانەوە، کە هاوکات لەگەڵ شەڕی غەززە دەستی پێ کردووە".
