هەرێم نیوز
ژمارەیەك لە سەرۆكی فیدراسیۆنەكانی تۆپی پێی جیهانی و هاوشانی بەرپرسانی وەرزشی لەسەر ئاستی جیهان، لە پاریسی پایەتختی فەرەنسا كۆبوونەوە بۆ ئەوەی لەگەڵ سەرۆکی فیفا و ئەندامەکانیان کۆببنەوە لەسەر مافی میوانداری کرندی مۆندیالی 2023، لەنێویاندا شانشینی سعودیە بەفەرمی پێشنیاری خۆی بۆ مۆندیالی ٢٠٣٤ پێشکەش کرد.
شازدە عەبدولعەزیز وەزیری وەرزشی سعودیە لەگەڵ سەرۆکی لیژنەی ئۆڵمپی ئامادەی مەراسیمی پێشکەش کردنی دۆسیەی میوانداری مۆندیالی 2034 بوون، لە بەرامبەردا جیان ئینفانتینۆ سەرۆکی فیفا گوتی: دۆسیەکانمان وەرگرتووە و بە وردی پێداچوونەوە دەکەین.
جیان ئینفانتینۆ سەرۆكی فیفا رایگەیاند لە ساڵی 1904ـەوە فیدراسیۆنی نێودەوڵەتی تۆپی پێ هەیە، ئێستا دوای 120 ساڵ لێرەن بۆ ئاهەنگگێڕان لەبۆنەیەکی تایبەت. گوتیشی: دەمەوێ سەرەتا سوپاسی شەش فیدراسیۆنی کیشوەرەکان بکەم، ئەم سەرۆکانە لەگەڵ من و ئەم وڵاتانە کۆبوونەوە کە دۆسیەکانیان بۆ مافی میوانداریکردن پێشکەش کردووە، هەمیشە دەگوترێت یەكڕیزی فیدراسیۆنەكانی تۆپی پێ جیهان وادەكات تۆپی پێی جیهان بەرەو بچێت، ئەوەتا 211 ئەندام لە فیفا هەن لە 211 وڵاتی جیاوازەوە، ئێمەش زیاتر لە نەتەوە یەکگرتووەکان هەوڵدەدەین کۆیان بکەینەوە و یەکیان بخەین.
جیان ئینفانتینۆ سەرۆكی فیفا دەشڵێت: کاتێک رووداویکی گەورەی وەكو كێبڕكێی مافی میوانداریكردنی مۆندیال دێتە پێشەوە بەداخەوە گرژی دروست دەبێت و برایەتی و دۆستایەتی کەم دەبێتەوە، هەموو دەیانەوێت مافی میوانداریکردن بەدەست بێنن یاخود شەڕ بکەن بۆ بردنەوەی ئەم جامە، هەموومان لەوە تێدەگەین کە مۆندیال هی هەموو جیهانە و موڵکی هیچ وڵاتێک بەتەنیا نییە، هەموو وڵاتێک مافی یاریکردنی هەیە ئەگەر سەرکەوێت، هەموو وڵاتیکیش مافی میوانداریکردنی هەیە، گرنگە مۆندیال لە هەموو بەشەکانی جیهان رێکبخرێت و خەڵک کۆبکەینەوە، لێرەدا هەنگاوەکانمان د ەست پێدەکەین بۆ تۆمار کردنی ناوی ئەو بەربژێرانەی دەیانەوێت میوانداریی مۆندیال بکەن، دەبێت کارەکان بەشێوازێک بێت هەموو ئەو مەرجانە هەبێت کە ئەنجوومەنی فیفا دیاری کردووە، ئەمڕۆ بەفەرمی دۆسیەکان وەرگیران.
ئەمە سێیەمجارە سعودیە دۆسیەی میوانداریكردنی مۆندیال پێشكەش دەكات، کۆتاجار بە فەرمی دۆسیەكەیان پێشکەشی سەرۆکی فیفا کرد، بریارە مۆندیالی 2030 لە وڵاتەکانی مەغریب، ئیسپانیا، پۆررتوگال هەروەها چەند یارییەکەیش لە پاراگوای و ئۆرگوای بەڕێوەبچێت.