هەرێم نیوز
رەغد سەدام حسێن، بە تۆمەتی بانگەشەكردن بۆ بیروباوەڕی حزبی بەعس، بە حەوت ساڵ زیندانیكردن سزادرا.
ئەمڕۆ دادگای تاوانەكانی كەرخی شاری بەغداد، بە یاسای قەدەغەكردنی حزبی بەعس و قەوارە و پارت و چالاكی و بیركردنەوە تیرۆریستییەكان و بە تاوانی بەشداریكردن لە بڵاوكردنەوەی بیروباوەڕ و بۆچوون و بانگەشەی میدیایی بۆ چالاكییەكانی حزبی بەعسی قەدەغەكراو، لە كاتی دەركەوتنی لە دەزگاكانی راگەیاندن و بانگەشەكردن بۆ بیروباوەڕەكانی لە كەناڵە تەلەفیزیۆنییەكان لە ساڵی 2021، بە غیابی بڕیاری زیندانیكردنی بۆ رەغد سەدام حسێن كچی سەدام حسێن سەرۆكی رژێمی لەناوچووی بەعس دەركرد و بە هەمان یاسا فەرمانی دەستگیركردنی بۆ دەركرد.
رەغد سەدام حسێن كچی یەكەم و گەورەی سەدام حسێنە، ساڵی 1968 لە بەغداد لەدایكبووە، تەمەنی 55 ساڵە و لە ساڵی 1995 لەگەڵ حسێن كامیلی هاوسەری بەرەو ئوردن هەڵاتن لەوكاتەوە لە ئوردن دەژی.
