لەو ڕوانگەوە ئەم دیبەیتەم بەهەڵە زانی، کە ئەسڵ وایە، گفتوگۆ و دیبەیت لە گەڵ خەڵکی ڕێباز سەلەفی هاوشێوەی دکتۆر عەبدوللەتیف، لەسەر بابەتێکی دەرەکی وەکو دۆخی غەززەو حەماس و ئیخوان نەبێت، لەبەرئەوەی زۆرێك لە خەڵکی کوردستان کاتێك وەك مرۆڤ و موسوڵمانیش هاوسۆزی ستەملێکراوە غەززەییەکانن، لەڕووی سیاسییەوە ئەو تێگەیشتن و هاوسۆزیەیان بۆ حەماس نییە، ئیخوانیش هەموو دەزانین چۆن لەڕێی کارلەسەرکردنێکی دوورودرێژەوە کراوەتە ڕەمزی خراپەو خوێنرێژی و دووژمنایەتیکردنی کورد، بەجۆرێك ئەگەر سووپای تورکیا و چەکدارەکانی جۆلانیش تاوانبکەن ئۆباڵەکەی بەجۆرێك لە جۆرەکان دەخرێتە ئەستۆی ئیخوان، کە دوو ڕەوت و قوتابخانەی جیاوازیشن لە ئەو.

خۆ بەخاوەنکردنی ئەم پرسانە لەڕووی سیاسی و بۆ هێزێك سیاسەت بکات بە ڕاست نابینم. پرسیار دەخاتە سەر ناسنامەو ئامانجی ناوەندی و ڕەنگە وێناشی زۆرتر بشێوێنێت، لەهەمان کاتدا کارێکیش دەکات ڕەمزە سەلەفییەکە، لە دەرەوەی بازنە ئیسلامییە سنووردارەکەی

کۆمەڵگە، خۆماڵیتر و واقیعیتر دەربکەوێت و بکەوێتەڕوو، لەکاتێکدا سەلەفییەت بەشێوەیەکی گشتی وەك فیکر و ڕەوتیش، کێشەی مەنهەجیی قووڵی لەگەڵ نەتەوایەتی بەواتا مۆدێرنەکەی هەیە،.بۆیە دانایانەتر و ڕاستر وایە، بابەتی ئەو جۆرە دیبەیتانەی ئیسلامییەکان لەگەڵ سەلەفییەکاندا ئەنجامی دەدەن، لەسەر کۆڵی پرسی تر بێت لە وێنەی، میانەڕەوی، بڕوا بوون و نەبوون بە جیاوازی و پێکەوە ژیانی ئایینی، نامۆبوونی سەلەفییەت بەتایبەتیش هەندێ فۆرمی بە ڕۆحی عەدالەتخوازانەی ئیسلام و تایپی دینداری کوردەواریی، بێ ڕەگ و ڕیشەییان لە مێژوو کۆمەڵگەی کوردستاندا، دژایەتیان لەگەڵ کۆمەڵێ مەعروفی سەردەم، وێناکردنی پەیوەندی هەڵە لەنێوان دین و دەسەڵاتی سیاسیدا و هتد.

واتە، ئیسلامیی لە سەنگەری بەرگریکردن لە میانەڕەوی، جیهادی شێخ و مەلای کورد لەپێناو میللەتەکەی، ناسنامەی دینداری کوردەواری، مەسەلە نیشتیمانییە کوردستانییەکەو بەهاکانی فرەیی و جیاوازی کرانەوەو و پێکەوە ژیاندا بێت، نەك لە سەنگەری لایەنێکی دەرەکی لە ململانێیەکی دەرەکیدا، کە مۆرك و دەرهاویشتەی هەیە، لە کوردستان جگ ەلەئاستی هاوسۆزی ئینسانی و دینی، لەڕووی سیاسییەوە کریاری نییە، دەکرێت لە هەندێ ئاسیشدا بێت، دەرهاویشتەی فیکری و سیاسی و قانونی هەبێت بێ ئەوەی لە ئاستی ئەو کێشەدا هیچ کاریگەرییەك درووست بکات.