ئەوەی تۆتالیتار و دكتاتۆر لەیەكتری جیا دەكاتەوە، تۆتالیتار، ترس لەناو خەڵك بڵاودەكاتەوە، هێز و دەزگایەكی گەورەی سەربازی هەیە، خەڵك دەترسێنن و هەركاتێك بیانەوێت لەناویان دەبەن و كۆتاییان پێدەهێنن.

ئەگەرچی دكتاتۆریش بەهەمان رێگەدا تێپەڕ دەبێت، بەڵام تۆتالیتار هەنگاوێك لەپێش دكتاتۆرە لەڕووی تۆقاندن و كوشتنی نهێنی و بەكۆمەڵ، ئەمەش بەگوێرەی گوتەی (هانا ئارێنت) كە لە كتێبی تۆتالیتاردا ئاماژەی بۆ كردووە.
چەند رۆژێك بەر لە ئێستا، ڤیدیۆیەكم بڵاوكردەوە، لەوێدا وەكوو وەڵامێك بۆ بەڕێز بافڵ تاڵەبانی، لەبارەی ئەوەی پارتی وەكوو هێزێكی خائین ناوبردبوو و گوتبووی، ئەگەر یەكڕیزی دەوێت، با بچێت پشتگیری لە رۆژئاوا بكات.
ئەوەی ڤیدیۆیەكەی بینیبێت، دەزانێت بە ئەدەب و زمانێكی لۆژیكی قسەم كردووە، باسم لە هەڵوێستی جەنابی سەرۆك كردووە، كە ١٥٠ پێشمەرگەی بە چەكی قورس ناردە كۆبانێ و هاوسەنگی هێزی گۆڕی و زۆر بابەتی تر.
لەسلێمانییەوە، زیاتر لە ٢٠ تەلەفۆنم بۆ هات، هەموو پێیان گوتم، كاك كارزان گلی، چۆن ڤیدیۆی وات بڵاوكردووەتەوە، ناترسیت بێیتە سلێمانی بتكوژن؟

بەهۆی ئەوەی خێزانەكەم سلێمانییە، تەلەفۆنیان بۆی كردبوو و ئەویشیان ترساندبوو و گوتبویان بە مێردەكەت بڵێ چیتر قسە نەكات، ناترسێت گەر بێتە سلێمانی بیكوژن؟

تۆ سەیری ئەو خەڵكە بكە لە سلێمانی چۆن ترسێنراون، یەكسەر بیریان بۆ ئەوەچووە لەسەر ڤیدیۆیەك، كە كۆمەڵێك زانیاریی بووە بكوژرێم.

كە دەڵێم تۆقاندن و ترس لە سلێمانیدا تەشەنەی كردووە، دەڵێن نەخێر شار ئارامە و تەنیا لە سلێمانییە دەتوانیت بە كەیفی خۆت بۆچوونی جیاوازت هەبێت، ئێ باشە بۆچوونێكی جیاوازم هەبوو، ئەی بۆچی ترستان هەیە لەسەر ئەو بۆچوونە بكوژرێم؟

من ناترسێم، چونكە هیچ سنوورێكی ئەخلاقی و سیاسیم نەبەزاندووە لە نووسین و ڤیدیۆكانمدا، رەخنەی جیدیم گرتووە، رەخنەی جیدیش هەمیشە بەرامبەرەكەت دەلەرزێنێت و ئازاری دەدات، رەنگە سووكایەتیكردن كاتی بێت و بڕوات، بەڵام رەخنەی جیدی بەدڵەوە دەنووسێت.

دەتوانن وەڵامم بدەنەوە، با وەڵامەكان جیدی بێت و گفتوگۆیەكی هێمنانە و ئەكادیمی و ئەخلاقی بێت، نەك لابەلا بگوێمدا بچەپێنن كە لەسەر ئەو بۆچوونانە بكوژرێم.

با بەنموونەیەك كۆتایی بەم باسە بهێنم:

نەسیمی، وەكوو حەلاج، لە لێواری مەرگیشدا واز لە بیروباوەڕە فەلسەفییەكانی ناهێنێت، بانگەوازی (انا الحق) بەرز دەكاتەوە.

زاهیدانی بیرتاریك، كە لەبەرامبەر ئەم پایەداری و خۆڕاگرییەی شاعیردا، تووشی سەرسوڕمان و شۆك بوون، بەتانە و تەشەر و گاڵتەپێكردنەوە لێی دەپرسن:

تۆ كە خۆت خودایت، ئەی بۆچی كاتێك خوێنت دەڕێژرێت رەنگت زەرد دەبێت؟

وەڵامی بوێرانەی نەسیمی هەمان وەڵامی دلێرانەی حەلاجە كە دەڵێت ” وەكوو خۆری ئاسمانی عەشقم، كە لە ئاسۆی ئەبەدییەتەوە هەڵدێت و سەر دەردەهێنێت، خۆریش لەكاتی ئاوابووندا رەنگی زەرد دەبێت“

مادام منیش بەرگری لە حەق دەكەم، كە لیستی ١٩٠ی پارتییە، بۆیە ترسم لە مردن نییە، ئەو هەڕەشانەی كە دەكرێت، زەڕەیەك لە خۆشەویستیم بۆ سلێمانی و خەڵكەكەی كەم ناكەتەوە.