نەورۆز لە ئیسلامی کوردەواریدا کە فرەزانا یان پیتۆڵ (علامة)ى وەک مەلا عەبدولکەریمی مودەڕڕیس و مەلای گەورەی کۆیە و دکتۆر موستەفا زەڵمی نوێنەرایەتی دەکەن، جائیزو جیاوازە.
مەلای گەورەی کۆیە، لەوتارێکی مێژوییدا سەبارەت بە جەژنی نەورۆز لە ( ٢١ / ٣ / ١٩٣٨ ) لە (بەر دەرکی سەرای شاری کۆیە) فەرموویەتی:
"ئەمڕۆ رۆژێکە پڕ نوور ، دونیا ماڵە ماڵە لە سرور ، ژاڵە دەدرەوشێتەوە ، لالە دەگەشێتەوە ، دارو درەخت دەپشکون بەروسەمەر دەردەکەون، فەلەک وەک خێوەتی زبر جەدی هەڵداوە ، زەمین کەوای ئەتڵەسی سەبزی گۆڵگوڵی لەبەر کرا ، ئافتابی عالەم درەخشانە خورشیدی خاوەری بە ئەشیعەی زەهەبی زەڕ ئەفشانە ، نێزیکە بڵێم ئەرزو سەما ، کەوتیتە رەقس و سەما ، ئەمە چ باس و خواسە چ ئەسەرە چ خەبەرە ،
بەڵێ ئەمڕۆ رۆژی مرادە ، نەورۆزی گەلە ، حەقە ، رۆژی زۆر موبارەکە ئەوەڵی بەهارە ، یەکی ئیعتیدالی لەیل و نەهارە ، جەژنە جەژنی ئۆممەتە ، جەژنی محەبەت و ئولفەتە .
هەروەها نووسەر (عەتا شەمێرانی) دەڵێت: لە ناوەڕاستی نەوەدەکان، لەسەروبەندی جەژنی نەورۆزدا، رۆژنامەی عیراق ئەم چاوپێکەوتنێک لەگەڵ زانا و نوسەری پایەبەرز مامۆستا مەلاعەبدولکەریمی مودەڕیس سازدەکات، بە ئامانجی ئەوەی مامۆستا بڵێت: نەورۆز، جەژنی کورد نیە و جەژنی فارس و ئاگر پەرستیە! مودەڕیس، زۆر زانایانە دەڵێت "جەژنی نەرۆز، جەژنێکی ناسراوی سەردەمی ئیسلام و پێش ئیسلامە، هیچ دژایەتیەکی لەگەڵ ئاینی موسوڵمانان نیە. جەژنی نەورۆز دروشمێک نیە بۆ فەساد، بەڵکو جەژنی بەهار و شادی کوردە.
هەروەها مودەڕیس دەفەرموێت" لە سەردەمی ئیمامی عەلی، جەژنی نەورۆز هەبووە و شیرینی دابەشکراوە، ئیمامی عەلی لە شیرینیەکەی خواردوەو وتویەتی ئەمە چیە؟ وتویانە ئەمە دروشمی ئێمەیە و لە نەرۆزدا دروستیدەکەین و دابەشیدەکەین، بەسەر ئەوانەی خۆشمان دەوێن. ئیمامی عەلی، دەفەرموێت: دەی کەواتە هەموو کاتێ جەژنی نەورۆز سازبکەن و گوزارشت لە خۆشی و شادی خۆتان بکەن.!"
بەڵام نەورۆز، لای ئیسلامی سیاسیی هاوردەکراو و موتوربەکراو بەتەکفیر و تەفسیق و تەبدیع و عوروبەت ناجائیزە.
ئامانجیش لە دژایەتیکردنی نەورۆز و بۆنە نەتەوەییەکانمان لەڕێگەی مۆدێلێکی هاوردەکراو لە ئیسلامەوە، سڕینەوەی ناسنامەو کەلتوری نەتەوەیی کوردە.
ئایا ئێوە هیچ حیزب و شێخ و سەرکردە و کادیرێکی ئیسلامیی عەرەب و فارس و تورکتان دیوە بەناوی ئاینەوە دژایەتی بۆنە نەتەوەییەکانی خۆیان بکەن ؟
ئەی بۆچی هەندێک لە ئیسلامییە سیاسییە کوردەکان لەژێر کاریگەری فیکری سەلەفیزم و ئیخوانیزمدا دژایەتی نەورۆز و بۆنە و کەسایەتییە نەتەوەیی و کەسایەتییە ئاینییە کوردەوارییەکان و ئیسلامی کوردەواری دەکەن ؟
وەڵامی ئەو دوو پرسیارەی سەرەوە بۆ ئێوە بەجێدەهێڵم.
کەواتە جارێکی دیکە نەورۆزتان پیرۆز بێت.