ئەم جیاکارییە چەمکی و یاساییە بنەمای تێگەیشتنە لەم قۆناغە، چونکە ئەوەی ئێستا لە ئارادایە (تەنانەت بەپێی ڕاپۆرتی کەناڵەگرنگەکانی جیهانیش) تەنها "یاداشتی لێکتێگەیشتنێکی سەرەتاییە نەک ڕێککەوتنی کۆتایی و گشتگیر (Comprehensive Deal). یاداشتی لێکتێگەیشتن لە پەیوەندییە نێودەوڵەتییەکاندا تەنها چوارچێوەیەکی یاسایی کاتییە بۆ ڕاگرتنی شەڕ و ڕێکخستنی بنەماکانی دانوستان، نەک دۆکیومێنتێکی کۆتایی کە پابەندبوونی هەمیشەیی دروست بکات.
ئەم ڕاستییە لە سەرنجدان لە واقیعی مێژوویی و جیۆپۆلەتیکی نێوان واشنتۆن و تاراندا لە چەند خاڵێکی جەوهەریدا کورت دەبێتەوە:
ئەم لێکتێگەیشتنە تەنها نەخشەڕێگایەکی کاتیی ٦٠ ڕۆژەیە بۆ هێورکردنەوەی دۆخی مەیدانی و دڵنیابوونەوە لە کرانەوەی گەرووی هورمز، تا لەم ماوەیەدا دەرفەت بۆ دیپلۆماتکاران بڕەخسێت بچنە ناو دانوستانە بنەڕەتییەکانەوە.
گەیشتن بە ڕێککەوتنی کۆتایی پێویستی بە جێگیرکردنی وردەکاریی یاسایی هەیە؛ ئیدارەی ترەمپ داوای هەڵوەشاندنەوەی تەواوی ژێرخانی پیتاندنی یۆرانێۆم دەکات، لە بەرامبەردا پرۆسەی لادانی سزا ئابوورییەکانی سەر ئێران پێویستی بە یاسای کۆنگرێس و کاتێکی درێژخایەنە کە بە چەند ڕۆژێک یەکلا نابێتەوە.
هیچ کام لەم دوو هێزە لە چوارچێوەی یاداشتێکی خێرادا دەستبەجێ دەستبەرداری کارتەکانی هێزی خۆیان نابن (چی پرسی هەژموونی هەرێمایەتی و بریکارەکان بێت یان پرسی مووشەکی)، بەڵکو ئەم ٦٠ ڕۆژە تەنها وەک قۆناغی تاقیکردنەوەی نیازپاکی لایەنەکان دیاریکراوە.
لەسەر ئەم بنەمایە، ئەم پێشهاتە تەنها خاڵی دەستپێکی پڕۆسەیەکی دوورودرێژە بۆ ئەوەی بزانرێت ئایا لە داهاتوودا زەمینە بۆ ڕێککەوتنی ڕاستەقینە دەڕەخسێت یان نا، نەک ئەوەی کێشەکان بە یەکجاری چارەسەر بووبن.