عێراق بەهۆی گرژییەکانی گەرووی هورمز و پەککەوتنی کەشتیوانی، ناچار بووە بەرهەمهێنانی نەوتی خۆی بە ڕێژەی ٧٠٪ کەم بکاتەوە (چونکە ٩٠٪ی نەوتەکەی بەو گەرووەدا تێدەپەڕێت و پشتبەستنی تەواوی بەوێیە). بۆ چارەسەری ئەم قەیرانە، حکومەت لە ڕێگەی "کۆمپانیای نەوتی بەسرە"وە پلانێکی خێرا جێبەجێ دەکات بۆ دۆزینەوەی ڕێڕەوی بەدیل لە باکوور و ڕۆژاواوە بە ئامانجی هەناردەکردنی 650 هەزار بەرمیل لە ڕۆژێکدا (کە دەکاتە ٦٠٪ی ئامانجی کۆتایی حکومەت بۆ گەیشتن بە پتر لە ١ ملیۆن بەرمیل). ئەم پلانە لە ڕێگەی کاراکردنەوە و پەرەپێدانی ئەم هێڵانەوە دەبێت:
زیاتر لە سێ ئەوەندەکردنی هەناردە لە ڕێگەی بۆری کەرکوک-بەندەری جەیهانی تورکیا (دوای ڕێککەوتنی بەغدا و هەولێر).
هەناردەکردن بە وشکانی و ئامادەکاری بۆ واژۆکردنی ڕێککەوتن بۆ ڕاکێشانی بۆری بەرەو بەندەرەکانی بانیاس و تەرتووسی سوریا.
خێراکردنی کارەکان لەسەر پڕۆژەی بۆری فرەئاڕاستەی "بەسرە-حەدیسە" بۆ گەیاندنی نەوت بە بەندەرەکانی عەقەبە (ئوردن)، سوریا و تورکیا.

کاریگەرییەکانی سەرکەوتنی ئەم پلانە لەسەر ئابووری عێراق
ئەگەر ئەم پلانە ستراتیژییە سەرکەوتوو بێت، گۆڕانکاری بنەڕەتی لە ئاسایشی ئابووری عێراقدا ڕوودەدات، کە گرنگترینیان ئەمانەن:
١-پاراستنی ئاسایشی دارایی و بودجە :
نەوت دابینکەری زیاتر لە ٩٠٪ی خەرجییەکانی بودجەی عێراقە. ڕزگارکردنی هەناردەی نەوت لە ژێر ڕەحمەتی یەک دەروازەی مه‌ترسیداری وەک هورمز، واتا دەستەبەرکردنی لێشاوی بەردەوامی داهاتی دۆلار بۆ ناو گەنجینەی دەوڵەت، ئەمەش ڕێگری دەکات لە هەرەسی ئابووری یان نەبوونی شایستە داراییەکان (وەک مووچە و خزمەتگوزارییەکان) لە کاتی شەڕ و قەیرانە هەرێمییەکاندا.
٢.-کەمکردنەوەی زیانە داراییە گەورەکان :
کەمکردنەوەی هەناردە لە ٩٣ ملیۆن بەرمیلەوە بۆ تەنها ١٠ ملیۆن بەرمیل لە مانگێکدا (وەک ئەوەی لە نیساندا ڕوویدا)، واتای زیانی ملیۆنان دۆلارە لە ڕۆژێکدا. سەرکەوتنی هێڵە بەدیلەکان ڕێڕەوی بازرگانی دەپارێزێت و عێراق لە سزاکانی "بێهێزی لۆجیستی" و بەرزبوونەوەی نرخی دڵنیایی (تأمین) لەسەر کەشتییە نەوتهەڵگرەکان لە کەنداودا دەپارێزێت.
٣- بەهێزبوونی پێگەی جیۆپۆلەتیکی و ئابووری عێراق:
کاتێک عێراق دەبێتە خاوەنی تۆڕێکی بۆری فرەئاڕاستە (تورکیا، سوریا، ئوردن)، پێگەی خۆی وەک هەناردەکارێکی جێگیری وزە لە بازاڕی جیهانیدا (بەتایبەت بۆ ئەوروپا و دەریای ناوەڕاست) دەچەسپێنێت. ئەمەش وڵاتانی هاوسێ ناچار دەکات بۆ پاراستنی بەرژەوەندییە ئابوورییەکانی خۆیان، کارئاسانیی یاسایی و گومرگی زیاتر بۆ عێراق بکەن.
٤- بوژانەوەی ناوچە ناوخۆییەکان و هێڵی گواستنەوە:
پڕۆژەی وەک بۆری "بەسرە-حەدیسە" یان هێڵەکانی باکوور، پێویستیان بە وێستگەی پاڵنەر، کۆگای گەورەی هەڵگرتن، و چاکسازی بەردەوام هەیە. ئەمەش دەبێتە هۆی:
ڕەخساندنی هەزاران هەلی کار بۆ ئەندازیاران و کرێکارانی ناوخۆیی.
بوژانەوەی ئابووری ئەو پارێزگایانەی بۆرییەکانی پێدا تێپەڕ دەبن.
پوختەی کاریگەرییەکە: ئەم پلانە، ئابووری عێراق لە ئابوورییەکی "بارمتەی یەک دەروازەی ئاوی"ییەوە دەگۆڕێت بۆ ئابوورییەکی "فرە دەروازەیی و نەرم"، کە بنەمایەکی سەرەکییە بۆ جێگیریی دراو و پلانی وەبەرهێنانی درێژخایەن.