مێژوو گه‌واهیده‌ره داگیركه‌ران ونه‌یارانی كوردستان هه‌رگیز چاویان به ئازادی و سه‌ربه‌ستی كوردستان هه‌ڵنه‌هاتووه و هه‌ڵنایه‌ت ؛ هه‌میشه به جۆرها چه‌كی كۆمه‌ڵكوژ و پیلانگێری و سیاسه‌تی گه‌له‌كۆمه‌كی و وێرانكاری هه‌وڵی ڕێگریكردن له‌كاروانی خه‌بات و كوردایه‌تی دوێنی و ئه‌مڕۆی پیێشكه‌وتن و گه‌شه‌سه‌ندنی كوردوكوردستانیان گڕتووه
بۆ قۆناغی ئه‌مڕۆی حكوومڕانی گه‌لی كورد له هه‌رێمی كوردستان وێرای هه‌موو پیلانگێری و ڕێگرییه‌كان له سه‌ر ئاستی عێراق و ده‌ره‌كیی به‌ڵام گه‌لی كورد به سه‌ركردایه‌تیی بارزانی و حكوومه‌ته یه‌ك له‌دوای یه‌كه‌كانی و به‌تایبه‌تی ئه‌م 6 ساڵه‌ی كابینه‌ی نۆیه‌می حكوومه‌تی كوردستان توانیوێتێتی ڕێگه‌ی سه‌د ساڵه ببڕێت بۆ گه‌یاندنی كوردستان بۆ ئاستی وڵاتانی پێشكه‌وتوو و گه‌شه‌سه‌ندووتر
ماوه‌ی زیاتر له 11 ساڵه ، نه‌یارانی كورد له سه‌ر ئاستی ناوخۆیی وده‌ره‌كی هه‌موو جۆره چه‌ك و تیرۆریست و میلیشیا و ئینجا فشاری دارایی و هاندانی هه‌ندێك لایه‌ن بۆ شكاندنی ئیراده و ڕاگرتنی گه‌شه‌سه‌ندن وپێشكه‌وتنه‌كانی گه‌لی كورد په‌یره‌و كردووه ، هێرش و مووشه‌كباران و درۆنبارانی شوێنه گرنگ و ئابووری و ستراتیژییه‌كانی هه‌رێمی كوردستان ،ئاماژه‌ن به شكست ودۆڕاوی دوژمنانی ئه‌م گه‌ل و نیشتیمانه و هه‌نگاوه‌كانی حكوومه‌تی كوردستان له‌بواری ڕووناكی و ئاوه‌دانی و ئاو و كاره‌با و بواره‌كانی تر ناحه‌زانی تووشی هیستریا كردووه
ئه‌م هێرشانه یه‌كه‌مینجار نییه ،به‌ڵكو له‌ماوه‌ی چه‌ند مانگی رابردوو ،چه‌ندین جاری دیكه‌ش هێرشكراوه‌ته سه‌ر پاڵاوتگه و كێڵگه نه‌وتی و غازییه‌كانی هه‌رێمی كوردستان له‌لایه‌ن میلیشیا و گروپه تیرۆریسته‌كانی حه‌شدی سه‌ر به ئێران ، به‌دڵنییایه‌وه ئه‌م هێرشه مووشه‌كی ودرۆنیانه به كه‌س ولایه‌نێكی ئاسایی ناكرێت به‌ڵكو ده‌ستی وڵاتانی ناوچه‌كه له‌پشته‌وه‌یه ، ئه‌وه‌ی جێگه‌ی هه‌ڵوه‌سته‌كردنه حكوومه‌تی عێراق زۆر بێ ده‌سه‌ڵاته و توانایی كۆنترۆڵكردنی گروپ و میلیشیا تیرۆریستی و له یاسا ده‌رچوونانه‌ی نییه و ئه‌و هێرشانه‌ی سه‌ر هه‌رێمی كوردستان پیلان دارێژراو بووه دژی به‌رژوه‌ندییه باڵاكانی خه‌ڵكی كوردستان
ئه‌وه‌ی جێگه‌ی هه‌ڵوه‌سته‌كردنه، پێشكه‌وتن وگه‌شه‌سه‌ندنه‌كانی هه‌رێمی كوردستان له بواره جیاوازه‌كاندا وایانكردووه ، هه‌رێمی كوردستان ببێته ناوه‌ندێكی گرنگ بازرگانی و شوێنی پێكه‌وه‌ژیانی سیاسی و كۆمه‌ڵایه‌تی و ئایینی و ئازادی و هه‌روه‌ها بوونی ده‌یان نوێنه‌رایه‌تی وڵاتانی ناوچه‌كه و جیهان و ئاماده‌كاریه‌كان بۆ كردنه‌وه‌ی گه‌وره‌ترین كۆنسوڵخانه‌له جیهاندا له‌لایه‌ن وڵاته یه‌كگرتووه‌كانی ئه‌مه‌ریكاوه و جیاواز له‌و سنووره جوگرافیا دژوار و پڕ ئاڵۆز وشه‌ره هه‌رێمی كوردستان پێشكه‌وتنی هه‌ولێر و پشتیوانی نێوده‌وڵه‌تی وایانكردووه ناحه‌زانی كوردستان تووشی هیستریا ببنه‌وه
كاتی ئه‌وه هاتووه به‌ڕێگه‌ی دیپلۆماسی گشت وڵاتانی زڵهێز و ئه‌ورووپا و نه‌ته‌وه‌یه‌كگرتووه‌كان له‌و هێرش وپه‌ڵاماردانه تیرۆریستیانه ئاگادار بكرێنه‌وه و فشار له‌سه‌ر عێراق و ئێران دروست بكرێت و له‌هه‌مانكاتیشدا كار بكرێت بۆ ئه‌وه‌ی سیسته‌می دژه مووشه‌ك و درۆنی له‌لایه‌ن ئه‌مه‌ریكاو هاوپه‌یمانانه‌وه بۆ هه‌رێمی كوردستان دابین بكرێت ؛ بۆ ئه‌وه‌ی ڕووبه‌ڕووی هه‌موو ئه‌و هێرشه تیرۆریستیانه‌ی گروپ ومیلیشیا له‌یاساده‌رچوونه‌كانی عێراق ببێته‌وه
مێژوو سه‌لمێنه‌ره ، گه‌لی كورد قوربانی گه‌وره‌ی له پێناو ئه‌مڕۆی شكۆمه‌ندی و سه‌ربه‌ستی و قه‌واره‌ی هه‌رێمی كوردستان به‌خشیووه ،دوێنی به‌چه‌كی كیمییایی و ئه‌نفال و كۆمه‌ڵكوژ نه‌یانتوانی ئیراده‌ی گه‌لی كورد بشكێنن، ئه‌م ڕێباز و خۆڕاگرییه هه‌ڵقوڵاوی بیروباوه‌ری كوردایه‌تی كه له سه‌ر بنه‌مای پێكه‌وه‌ژیان ولێبورده‌یی و خه‌باتێكی بێوچانی له پێناو كردووه ؛ به‌دڵنییاییه‌وه به گه‌مارۆدان و دژایه‌تیكردنی ماف و شایسته‌كانی گه‌لی كورد و هێرشه مووشه‌كی ودرۆنییه‌كان بۆ سه‌ر كێڵگه‌ی نه‌وت و غازی كوردستان ناتوانن خه‌ونه‌كانتان بێته‌دی
ئه‌م مه‌ڕامه دوژمنكارانه‌یه‌ی نه‌یاران بۆ ملكه‌چكردنی خه‌ڵكی كوردستان و سه‌رقاڵكردنی خه‌ڵكی كوردستان و شاردنه‌وه‌ی شكسته‌كانیان له ناوچه‌كه، چونكه ئه‌وان هه‌رگیز چاویان به بوونی قه‌واره‌ی هه‌رێمی كوردستان و پێشكه‌وتن و گه‌شه‌سه‌ندنه‌كانی له ناوچه‌كه‌دا هه‌ڵنایه‌ت و به‌هه‌موو توانایه‌كه‌وه فشاری له‌سه‌ر دروست ده‌كه‌ن و په‌لاماری ده‌ده‌ن ، بۆیه جگه له‌ده‌ستوه‌ردانی ناوخۆیی وبه‌كارهێنانی هه‌ندێك كه‌س ولایه‌نی ناوخۆیی كوردستان ، به‌ڕێگه‌ی میلیشیا و گر وپه تیرۆریستیه‌كانیانه‌وه له عێراق به درۆم و مووشه‌ك په‌ڵاماری كوردستان ده‌كه‌ن و بابه‌ته‌كه‌ش ته‌نیا ڕێگریكردنه له پێشكه‌وتنه‌كانی كوردستان و ملكه‌چه‌كردنی هه‌رێمی كوردستانه ، ئه‌وان نایانه‌وه‌ێت خه‌ڵكی كوردستان به ئاشتی و ئازادی و سه‌قامگیری بژیت و بۆیه سیاسه‌تی برسیكردن و گه‌مارۆ و لێدانی پێگه‌ی هه‌رێمی كوردستانه و له‌كاتێكدا گه‌لی كورد
مێژوویش گه‌واهیده‌ره كه گه‌لی كورد و هه‌رێمی كوردستان هه‌رگیز به‌شێك نه‌بووه له ململانێ نێوده‌وڵه‌تی وئاڵؤزییه‌كانی ناوچه‌كه و ماوه‌ی 33 ساڵه حكومڕانی هه‌رێمی كوردستان نه‌بووته هۆی كاری تێكده‌رانه و دوژمنكارانه به‌رامبه‌ر هیچ گه‌ل و وڵاتێكی ناوچه‌كه و دراوسێ ، بگره كاری بۆ ئاشتی و سه‌قامگیری و به‌رژوه‌ندی هاوبه‌ش كردووه ، كه‌چی میلیشیا تیرۆریسته‌كانی كه لایه‌ن وڵاتێكی درواسێ و به‌غداوه پیشتیوانیان ده‌كرێت هێرش ده‌كه‌نه سه‌ر به‌رژوه‌ندییه باڵاكانی خه‌ڵكی كوردستان
پێده‌چێت نه‌یارانی كوردستان ئه‌وه‌یان له بیركردبێت ،هه‌ستی كوردبوون و له‌سه‌رووی مووشه‌ك و درۆنه‌كانی میلیشیا و گروپه تیرۆریسته‌كانه ، كوردو سه‌رۆك بارزانی به‌هێزترن له قه‌یران و هه‌ڕه‌شه وهێرشه تیرۆریستیه‌كان و بۆیه له‌گه‌ڵ هه‌ر په‌ڵاماردانێكدا گه‌لی كورد زیاتر له رووی كوردایه‌تی و دژایه‌تیكردنی دوژمنه‌كانی سه‌رسه‌ختتر ده‌بێت و ئیراده‌ی له پێناو ژیان و كه‌رامه‌تی به‌رز ده‌بێت ، برۆن لاپه‌ره‌كانی مێژوویی خه‌بات وئه‌نفال و كۆمه‌ڵكوژیكردنی گه‌لی كورد هه‌ڵده‌نه‌وه ، له دوای هه‌موو تاریكایی شه‌وه زه‌نگه‌وه تروسكایی رووناكی و ئومێدێكی گه‌وره ده‌رده‌كه‌وێت .