هەرێمى کوردستان چەند ساڵێکى پڕ سەخت و دژوارى بەڕێکرد ، گوشارەکان هەم لە سەر ئاستى ناوخۆیی وعێراق و ناوچەیی هەموو ئامانجیان لاوازکردن و نەهێشتنى قەوارەى هەرێمى کوردستان بوو ، بەتایبەتى هەندێک لایەنى کوردى لە پێناو بەرژوەندى کەسى وحزبى وێراى ئەوەى خۆیان بە هاوبەشى حکوومڕانى دەزانى و هەندێکى دیکەشیان بەناوى ئۆپۆزسیۆن بەڵام هەمان پیلان و نەخشەى نەیارانى کوردیان دژى ئەم گەل و ئەزموون و بەتایبەتى پارتى دیموکراتى کوردستان کە هەڵگرى بەرپرسیاریەتى مێژووی و سەخت بوو بۆ گەل و هەرێمەکەى ، ئەوان نەک تەنیا شانیان نەدایە بەرپرسیاریەتى و پشتیوانیکردنى حکوومەت بەڵکو تەنیا پارتى توانى بە پشتیوانیکردنى حکوومەتى کوردستان و کابینەى نۆ ، بەسەر هەموو فشار و گەلەکۆمەکییەکاندا زاڵ بێت و بە پرۆژەى خزمەتگوزارى بێ وێنە لە سەرانسەرى کوردستان وەڵامى نەیارانى کورد بداتەوە
ئەوەش سەلمێنەرى ئەو راستییەیە وخەڵکى کوردستانیش باش دەزانن تەنیا پارتى خۆى بە خاوەنى ئەم ئەزموون و حکوومەت و دەستکەوتەکانە دەزانێ حزبەکانیى تر تەنیا بە دژایەتیکردنى پارتى و بێ ئەوەى هیچ پرۆژە و بچووکترین ئەرک و بەرپرسیاریەتى هەڵبگرن بۆیە پێیان وابوو ئەگەر دژایەتى حکوومەتى کوردستان و پارتى بکەن ئەوا زیاتر لە ناو جەماوەرى شیرینتر دەبن ، بەڵام بینیمان خەڵکى کوردستان چۆن لە هەڵبژاردنەکاندا وەڵامیان دانەوە چۆنیش بەدژایەتیکردنى حکوومەت زیانیان بەرکەوت
مێژوو گەواهیدەرە وێراى هەموو ئاڵنگارى وئاستەنگەکانى بەردەوام حکوومەتى کوردستان بە سەرۆکایەتى بارزانى ،چەندە سەرکەوتووانە توانى بە سەر کێشە سیاسیی و قەیرانە دەستکردەکان و پیلانى نەیاران لە عێراق و ناوخۆ دا زاڵ بێت و ئەوەى ئەم حکوومەت بە سیاسەت و ئیدارەدانى ژیرانەى ئەنجامى دا لە مێژووى هیچ حکوومەتێک لە ناوچەکەدا لەماوەى دەیان ساڵیشدا نەکراوە ،ئیتر هەر لە سیستەمى ئیدارى و کارەبا و ئاو و ڕێگاوبان و بانکى و کشتوکاڵ و پێشەسازى و بوارەکانى دیکە ، بۆیە هەرێمى کوردستان لەسایەى خوا و خۆڕاگرى خەڵکى کوردستان و بەسەرۆکایەتى ڕێزدار مەسروور بارزانى ، پێشکەوتنى یەکجار گەورەى بەدەستهێناوە و ئێستەش خەڵکى چاوەروانە بەخێرایی کابینەى دەیەمى حکوومەتى کوردستان پێکبهێنڕێت تاکوخزمەتى زیاترى خەڵکى کوردستانى پێبکرێت
چونکە خەڵکى کوردستان باوەرى تەواویان بە سەرۆکى حکوومەتى کوردستاهن هەیە و بەهیچ شێوەیەک پروپاگەندەى نەیارانى کوردستان لە دژى ئەم حکوومەت کاریان تێناکات ، ئێستا چاوەرانى پێکهێنیانى کابینەى دەیەمى حکوومەتن و نایانەوێت هیچ لایەک ڕێگرى لێ بکات ؛ پارتى دیموکراتى کوردستان وەک هێزی یەکەمى کوردستان هەوڵەکانى لە پێناو پێکهێنانى حکوومەتى نوێ دەستپێکردووە ، وێراى ئەوەى نەیارانى کورد هەوڵ دەدەن ڕێگرى لە پێکهێنانى کابینەى دەیەم بکرێت ، بەڵام خەڵکى کوردستان بە ئاگایە چونکە پرۆژە گرنگەکانى حکوومەت لە هەولێر و دهۆک و ناوچەکەکانى دیکەى کوردستان رۆژ بەرۆژ متمانەى زیاتریان دروستکردووە و خەڵکى ناوچەکانى دیکەش چاوەروانى پێکهێنانى حکوومەتن بۆ گەیشتنى دەستى خزمەتگوزارى و ئاوەدانى بۆ شوێنەکانى دیکەش
ناوچەکە بە کۆمەڵێک کێشە و ململانێى قورسدا تێدەپەڕێت و خەڵکى کوردستان خوازیارى کوردستانێکى بەهێز و یەک حکوومەتى خزمەتگوزارە و ناچێتەژێر بارى پرۆپاگەندە و چەواشەکارى و دژایەتیکردنى ئەم ئەزموون و حکومەتى خۆیانەوە ، مێژووى چەند ساڵى رابردووش سەلماندى ئەوانەى دژایەتى حکوومەتى کوردستان و ئەم ئەزموونەیان دەکرد و خەڵکیان هەڵدەخەڵەتاند تەنیا لە بیرى بەرژوەندى خۆیان بوون نەک خەڵکى کوردستان ، بۆیە خەڵکى کوردستان ئومێدى زۆریان لە سەر کابینەى دەیەمى حکوومەت بە سەرۆکایەتى مەسروور بارزانى هەڵبچنیووە بۆ ئەوەى زیاتر خزمەتگوزارییان پێشکەش بکات و هەر لایەنێک ڕێگرى لە پێکهێنانى حکوومەتى کوردستان بکات ، واتا دژایەتیی خواستى خەڵکى کوردستان دەکات و دەرئەنجاى ئەو دژایەتیکردنانەش بە زەررى خودى ئەو لایەنە دەشکێتەوە و چونکە کاروانى خزمەتگوزارى و گەشەسەندنى کوردستان بەهیچ پیلان و کۆسپێک ناوەستێت