هەرێم نیوز
یوسی کۆهن، سەرۆکی پێشووی مووساد، لە وتووێژێکدا لەگەڵ ڕۆژنامەی هائارتز ڕایگەیاند، کە ئەو ڕێکخراوەیە ئۆپەراسیۆنە هەواڵگرییەکانی خۆی "ڕاستەوخۆ لەناو ئێران" ئەنجام دەدات و پشت بە نێوەنگیر و کرێگرتە نابەستێت بۆ جێبەجێکردنی ئەرکەکانی.
کۆهن دەڵێت، کە هێزە هەواڵگرییەکانی ئیسرائیل دەچنە ناو ئێران، تۆڕ دروست دەکەن و دەست دەکەن بە کۆکردنەوەی زانیاری.
ئاماژەی بە هێرشەکانی ئەم دواییەی ئەمریکا و ئیسرائیل کرد بۆ سەر دامەزراوە ئەتۆمییەکانی ئێران لە کاتی شەڕی دوازدە ڕۆژەدا و وتی ئامانجی ئەو کارانە بریتی بووە لە دروستکردنی "وەستانێکی جیدی" لە بەرنامە ئەتۆمییەکەی تاران.
ئەو وتی کە بانگەشەی "لەناوبردنی تەواوی" ئەو بەرنامەیە واقیعی نییە، بەڵام ئەو وەستانەی دروست بووە گرنگییەکی زۆری هەیە.
بە وتەی سەرۆکی پێشووی مۆساد، ئێران هێشتا بڕێکی یۆرانیۆمی پێتێندراوی لەگەڵە و "دەستبەرداری ئامانجە ئەتۆمییەکانی نەبووە".
لە بەشێکی تری قسەکانیدا، سەبارەت بە پەیوەندییە هەرێمییەکان، وتی کە ئەگەری ڕێککەوتنی ئاشتی لە نێوان سعودیە و ئیسرائیل بە ئەگەرێکی گونجاو دەزانێت و پێی وایە لەو چوارچێوەیەدا دەتوانرێت چارەسەرێک بۆ پرسی فەلەستینیش بدۆزرێتەوە.