هەرێم نیوز
پاشنیوەڕۆی ئەمڕۆ شەممە (٩ی ئایاری ٢٠٢٦)، مەسرور بارزانی، سەرۆکی حکومەتی هەرێمی کوردستان، لە کۆشکی مێژوویی "دۆڵمە باخچە" لە شاری ئیستانبوڵ، لە لایەن ڕەجەب تەییب ئەردۆغان، سەرۆک کۆماری تورکیاوە پێشوازی لێ کرا.
ئامادەبوونی بەرپرسانی باڵای ئەمنی و سیاسی
کۆبوونەوەکە بە ئامادەبوونی شاندێکی باڵای تورکیا بەڕێوەچوو، کە پێکهاتبوون لە وەزیرانی دەرەوە، وزە، بەرگری و بەرپرسی دەزگای هەواڵگریی تورکیا (میت). هەردوولا جەختیان لە بەهێزترکردنی پەیوەندییەکان و هاوئاهەنگیی نێوان هەولێر و ئەنقەرە لە بوارە جۆراوجۆرەکاندا کردەوە.
ستایشکردنی ڕۆڵی هەرێمی کوردستان لە ئاشتیدا
لە کۆبوونەوەکەدا، مەسرور بارزانی ستایشی ڕۆڵی تورکیای کرد لە پاراستنی سەقامگیریی ناوچەکە. لە بەرامبەردا، سەرۆک ئەردۆغان ڕۆڵی سەرۆکی حکومەت و هەرێمی کوردستانی وەک "فاکتەرێکی گرنگی ئاشتی و ئارامی" لە ناوچەکەدا بەرز نرخاند. هەردوولا هاوڕابوون لەسەر پێویستیی کۆتاییهێنان بە گرژییەکان و چارەسەرکردنی کێشەکان لە ڕێگەی گفتوگۆوە.
حکومەتی نوێی عێراق و مافە دەستوورییەکان
بەشێکی سەرەکیی گفتوگۆکان تەرخانکرا بۆ پرسی پێکهێنانی کابینەی نوێی حکومەتی فیدراڵ لە بەغدا. هەردوولا هیوایان خواست کابینەی نوێ ببێتە هۆی چەسپاندنی ئاشتی و خزمەتکردنی گشت پێکهاتەکان، هەروەها کێشەکانی نێوان هەولێر و بەغدا لەسەر بنەمای دەستوور چارەسەر بکرێن.
پرۆسەی ئاشتی و چەکدانانی پەکەکە
تەوەرێکی دیکەی هەستیاری کۆبوونەوەکە، پرۆسەی ئاشتی و پرسی چەکدانانی پەکەکە بوو. مەسرور بارزانی پشتگیریی هەرێمی کوردستانی بۆ سەرکەوتنی ئەم پرۆسەیە دووپات کردەوە. سەرۆک کۆماری تورکیاش جەختی لە گرنگیی بەردەوامبوون و بەئەنجامگەیاندنی ئەم هەنگاوە کردەوە وەک بنەمایەک بۆ سەقامگیریی تهواو لە ناوچەکەدا.
ئەم سەردانە فەرمییەی سەرۆکی حکومەت بۆ تورکیا، لە کاتێکی گرنگدا دێت کە ناوچەکە ڕووبەڕووی چەندین ئاڵنگاریی نوێی سیاسی و ئەمنی دەبێتەوە.