پزیشكێكی دڵی توركیا، سووكایەتی بە نەتەوەی كورد دەكات و بە جۆرێكی خوار مرۆڤ ناوی دەبات. لەسەر ئەو سووكایەتییە، دەم پارتی بەفەرمی داوای یاسایی لەسەر ئەو پزیشكە تۆمار كرد.

دكتۆر بینگی باشەر، پزیشكی دڵ لە توركیا، لە هەژماری خۆی لە (X)، سووكایەتی بە كورد دەكات و بە جۆرێكی خوار مرۆڤ ناوی دەهێنێت، ئەمەش كورد تۆڕە دەكات.
باشەر، زیاتر لە نیو ملیۆن فۆلۆوەری هەیە لە تۆڕی كۆمەڵایەتی ئێكس، دەنووسێت: ”ئەو وزەیەی بۆ لەنێوبردنی ئاژەڵانی سەر شەقام خەرج دەكرێت، باشتر نییە بۆ چاكسازیی ئەم جۆرە بوونەوەرانەی خوار مرۆڤ بەكاربهێنرێت؟“

باشەر، لەو پۆستەیدا مەبەستی لە كوردە، چونكە لەگەڵ پۆستەكەدا كاریكاتێرێكی (دۆڵی هرتەكان)ی بڵاوكردووەتەوە، ئەو وشەیەش تایبەت لە توركیا بۆ سووكایەتیی بە كورد بەكاردەهێنرێت.

كۆمیسیۆنی یاسا و مافەكانی مرۆڤی دەم پارتی، بەناوی هاوسەرۆكانی دەم پارتی، سكاڵایان پێشكەشی داواكاری گشتی ئەنكەرا كرد و لە سكاڵاكەدا دەڵێن، باشەر بە وروژاندنی ئاشكرای رق و كینە و هاندان بۆ تاوان تۆمەتبار كردووە و داوا دەكەن رێكاری یاسایی لە دژ بگیرێتە بەر.

(دۆڵی هرتەكان)، كە باشەر لە پۆستەكەیدا وەكوو ئاماژەیەك بۆ كورد بەشێوەی كاریكارتێر بڵاوی كردووەتەوە، ئاماژەیە بۆ گوتاری (هرت)، كە وشەیەكە لە توركیا بەشێوەیەكی سیستەماتیكی بۆ سووكایەتیكردن بە كورد بەكاردەهێنرێت.

ئەو كەسانەی ئەو وشەیە بەكاردەهێنن، مەبەستیان لە كوردە، بەڵام بۆیە راستەوخۆ ناوی كورد ناهێنن، دەیانەوێت لە سزای یاسایی خۆیان بدزنەوە. هرتیش بە واتای ئەوەی، دز و جەردە و ژتكووژ و ناشارستانی دێت.
لە ساڵانی حەفتایەكاندا، گۆڤارێكی سەر بە مەهەپە، بەڕوونی سووكایەتی بە كورد كردووە و لە راپۆرتێكدا داوایان كردووە پێویستە (DNA) كورد وەربگیرێت و بزانن كورد، مرۆڤە یان مرۆڤ نییە.
ئەوكات ئیسماعیل بێشكچی و زیا تاریق ئاكنجی، بەفەرمی داوای یاساییان لەسەر گۆڤارەكە و مەهەپە تۆمار كرد، بەڵام دادگا هیچ سزایەكی نەدان و تەنانەت دۆسیەشی لەسەر ئەو سووكایەتییە بە كورد نەكردەوە.
دوای ئەوەی كەنان ئێڤرەن، كودەتای ١٩٨٠ ئەنجام دەدات و دەبێتە سەركۆماری توركیا، داوا دەكات لە هەموو شارەكانی توركیا، چەند قوتابییەكی زیرەك بهێننە ئەنكەرا و مەراسیمیان بۆ بكات. ئەوكات لە هەكارییەوە پەروین بوڵدان، پەرلەمانتاری دەم پارتی دەهێنرێت.
بوڵدان دەڵێت: “كاتبك بە ئێڤرەنم گوت لە هەكاری هاتووم، پێی گوتم تۆ كوردی كلكداریت”
لەناو توركیا نوكتەیەك هەیە، وەكوو سووكایەتی بە كورد بەكاردەهێنرێت و نوكتەكە بەو شێوەیەیە: “لە كەریان پرسی كوردیت، حەوت رۆژ مانی لە خواردن گرت و خەفەتی خوارد بە كوردی بچوێنن”

بەڵام كوردیش وەڵامی بۆ ئەو نوكتەیە هەیە و دەڵێن” كەر حەقی خۆی بوو مانی لە خواردن گرت، چونكە لەناو دەماریدا توركبوون هەیە و بۆچی پێی دەڵێن كورد؟”
بەداخەوە ئەم جۆرە سووكایەتییە، پێمان دەڵێت كەشێكی سیاسی و بەبەرنامە بۆ داڕێژدراو هەیە لە توركیا، كە ١٠٠ ساڵە كاری بۆ دەكرێت، ئەویش ئەوەیە نیشانی بدەن كورد لە توركیا نەگەیشتووە بە مەدەنییەت و هەروەها لەرێگەی زنجیرە دراماكانیانەوە، كورد وەكوو پیاوكوژ و ژنكووژ و دز و جەردە وێنا دەكەن.

بەڵام دەبێت ئەوە باس بكرێت، ئەردۆغان لەوەتەی هاتووتە سەر دەسەڵات لە ٢٠٠٣، بەهیچ شێوەیەك، نە خۆی و نە سەركردەكانی پارتەكەی، یەك وشەی سووكایەتییان بەرامبەر بە كورد بەكارنەهێناوە، بەڵام نەژادپەرستەكان و ئەتاتوركچییەكان، سڵیان نەكردووەتەوە لەوڕووەوە.
لە چەند رۆژی داهاتوو، بەڤیدیۆ لە (تیك تۆك)، بەوردی لەسەر ئەو بابەتە دەدوێم.