کاتێ من بمەوێ شتەکان باش و تەواو بن و خراپەیەک لە ئارادا نەبێ، وەک مەرج بۆ نیشتیمان پەروەریی، کەواتە ئەوکات نیشتیمانخوازیی و دڵسۆزیی و ئینتیمای من چ چالێنج و چ مانایەکی دەبێ؟
کەواتە ئەوە من خۆم نیم کە نیشتیمانەکەم دەوێ ئەوە ئەوانی ترن منیان ناچار بە نیشتیمان خوازیی یا رەتکردنەوەی کردوە.
ڕاستی ئەوە یە کە مانا و بەها لەناو دەرگیربوندا دروستدەبێ نەک لە سەر سینی حازر پێشکەش بکرێ
واتە دەبێ ئینتیما لە بەردەم تەحەدایەکی لۆژیکیدابێ وەک ئەوەی دەڵێن (ئەمانە ئینتیمایان نەهێشت) ئەوکاتە بوونی ئینتیما مانا و بەها وەردەگرێ
هەر دەمێ خراپەیەک رویداو لە نیشتیماندا ژیان سەخت بو ، ئیدی نیشتیمان و قەوارەو هەرچی هەیە و نیە توڕ هەڵدرا کەواتە ئیدی تاک بەرکارەو بکەرێک لە ئارادا نیە
لەم حاڵەتەدا تاک جگە لە بەشێک لە هاوکێشەیەک چی ترە؟ ١+١= ٢ تەواو.
ئەی تۆ کوایت تا ئەم هاوکێشەیە وەک مەلەکشا بگۆڕیت؟
تەسلیم بون بە هاوکێشەکان بون ناسەلێمنن تەحەداو روبەروبونەوەی هاوکێشەکان ئەیسەلمێنن کە تۆ هەیت و بونت جیاوازیەک دروستدەکات
مەترسیدارە تەسلیم بون بەهاوکێشە زۆر مەترسیدارە ، ئەوەندە مەترسیدارە سبەی دێن و وڵاتەکەمان داگیر دەکەن و دراوسێکەمان سەردەبڕن و کچە نۆ ساڵانەکانمان دەبەن و گەنجەکانمان سەرشۆڕ دەکەن و بە هەزاران پێشمەرگەمان دەکوژن و …
لەو لاوە ئێمەش وەک شرۆڤەکار و چالاکوان دێینە سەر شاشەکان -ئەگەر شاشەیەک مابێ بۆ چەنە بازی- و دەڵێین: بەداخەوە دەسەڵات کارێکی کرد کەس ئامادە نەبو بەرگری لەم نیشتیمانە بکات ! ئاخ لەو حەسرەتە