بەشێکی بنەرەتی چیرۆکی دامەزراندنی ئیسرائیل، پشتی بە گووتاری هۆلۆکۆست، واتە جوولەکە قرانەکەی دەوڵەتی نازی ئەڵمانیا لەسۆنگەی نەژادپەرستی ودژایەتی سامییەوە بەستبوو. بەو واتایەی، بۆئەوەی جوولەکەکان لەو دۆخە رزگاریان ببێت، دەبێت دەوڵەتێکی تایبەت بەخۆیان بۆ دابمەزرێت، تاکو بەرگریان لێبکات وپارێزبەندیان پێببەخشێت و لەسەریانهەڵبداتێ.

ئەم گێرانەوە ئیسرائیلییەش تەنها لەچوارچێوەی بزووتنەوەی زایۆنیدا قەتیس نەما، هەروەها هاوشێوەی سەردییەتێکی مێژوویی وسیاسی ئاسایی مامەڵەی لەگەڵدا نەکرا، بەڵکو تاراددەیەکی زۆر پیرۆزی پێبەخشرا، بەجۆرێك لەهەندێ وڵاتی ئەوروپیدا، هەرگوومانکردنێك لێی سزای یاسایی بەدواوە بوو!، هەروەها بووبە سەردییەت وگێرانەوەی کۆی خۆرئاواو تەنانەت رێکخراوە نێودەوڵەتیەکان ولەوانەش نەتەوە یەکگرتووەکان.

بەڵام تۆفانی ئەقساو لێکەوتەکانی، لەوانەش بریارەکەی ئەمرۆی دادگای تاوانی نێودەوڵەتی بەدەستگیرکردنی ناتەنیاهۆو غالانی وەزیری پێشووی بەرگری ئیسرائیل بەتۆمەتی ئەنجامدانی تاوانی جەنگ وکۆمەڵکووژی دژبە فەلەستینییەکان، بەزەبرێکی گەورەو بێپێشینە لەوبناغەو چیرۆکی رەوایەتیە دادەنرێت کەئیسرائیلی لەسەر دامەزراوە. بەجۆرێك ئیدی چیدیکە دژایەتی سامی وبیرهێنانەوەی هۆلۆکۆست لانی کەم لەچوارچێوەی پێدراوەکانی ئێستای دنیادا، ناتوانن وەکو جاران پارێزبەندی بۆ ئیسرائیل وسووپاو رەفتارەکانی دەستەبەرکەن وبەکردەوە بیانخەنە سەروو ڕێساکانی یاسای گشتی نێودەوڵەتیەوە، لەبەرئەوەی کۆی چیرۆکەکە کەوتە ژێر پرسیارەوە.

هەموو ئەوەش زاددەی عەقڵی تووندرەوی حکومەتی ئێستای ئیسرائیل ومامەڵەکردن بەو عەقڵییەتەوە بوو، کەئەوە ئەوانن لەرێی خۆیان وهاوپەیمانە نێودەولەتەکانیانەوە، ئەرك بۆ دامەزراوە نێودەوڵەتیەکان وچۆنییەتی راڤەکردنی دەقەکانی یاسای گشتی وئینسانی نێودەوڵەتی و وەسفپێدانی یاسایی وئەخلاقی بەرەفتارەکانیان دیاریدەکەن نەك بەپێچەوانەوە. بێئاگا لەوەی هەندێجار تاوانە گەورەکان، هەژێنەرن و کارلەسەر زۆر زهنییەت و وێناو هاوکێشەی چەقبەستوو دەکەن، بۆ ساتێکیش بێت، مرۆڤەکان دەکەنەوە بەمرۆڤ، کەیەکێ لەدیاریکەرە بنچینەییەکانی مرۆڤیش بوونی ویژدانی ئەخلاقیە.