کەوتنە نێو ئاوی کیژۆڵەیەکی دوازدە ساڵانەی گەشتیاری کەربەلایی و کارلێک و بە هاناوەچوونی بێ وێنەی خەڵکی هەڵەبجە و هەورامان بەدەم ڕووداوەکەوە، هەر لە ساتی ڕوودانییەوە تا نوێژ لەسەرکردن و بەڕێکردنی تەرمەکەی، نموونەیەکی گەورەی ئەخلاقی ئیسلامی و ئینسانی بوو. ئەگەر کاتی خۆی هەڵەبجە لە نائومێددترین ساتەکانی کوردی باشور و شۆڕشە چەکدارییەکەیدا، بەخوێن و ئاهو ناڵە و جەرگی سووتاوی ڕۆڵەکانی، بووبێتە ناسنامەی نەتەوەکەی و نیشاندانی مەرگەساتی واقیعی نەتەوەیەکی بێ دەوڵەت لە دۆخی جینۆسایدکردندا، ئەوا ئەمجارەش بە جۆرێکی تر نوێنەرایەتیەکی ئەخلاقیی کوردی کردەوە، کە بە شێوەیەك لەشێوەکان دەچێتە چوارچێوەی دیبلۆماسییەتی میللییەوە و ئاماژەی گرنگیشی لەگەڵ خۆیدا هەڵگرتووە، کە دەکرێت لەساتەوەختێکی هەستیاردا وەبەرهێنانی سیاسی بەرچاوی تێدا بکرێت. بۆیە وێڕای ستایش و ڕێزی گەورەمان بۆم هەڵوێستەگەورەیە، هەقوایە لەلایەن کەناڵ و سایتە عەرەبییە کوردییەکان و بە زمانەکانی تریش ئیشێکی چەند ڕۆژەی ئامانجداری لەسەر بکرێت و هەروا بە سانایی بەرێ نەکرێت، لە داهاتووشدا بکرێتە بابەتی فلیمێکی دیکۆمێنتاری. 

لە لایەکی ترەوە گرنگە سەرنج بۆ ئەوە ڕابکێشین، کە کورد هەر لە سەلاحەددینی مەزنەوە بگرە تا دیمەنی ڕاپەرین و گێڕانەوەی دەیان هەزار سەربازی عێراقی بۆ باوەشی خێزانەکانیان و ئەم ڕووداوەو چەندینی تر، سەلماندوویەتی کە میللەتێکی  بەئەخلاق مسوڵمان و مرۆڤ دۆست و لێبوردەیە، هەروەها نەتەوایەتی کوردیی نەتەوایەتیەکی مافخوازە و دوورە لە شۆفێنیەت و دەمارگیری کوێرانە و توندرەوییەوە، بەڵام تاکو ئێستا لەسۆنگەی هۆکاری جۆراوجۆرەوە، لە هەندێ وێستگەی کەم و دابڕاودا نەبێت نەیتوانیوە بەگوێرەی پێویست، هەمان ئەخلاق و بەهاو ڕوحییەت بێنێتە ناو ماڵەکەی خۆی و گیانی هاوچارەنوسی و برایەتیەکی قووڵ لەنێوان هێز و پێکهاتەو ناسنامە لاوەکییەکانی ناویدا درووست بکات کە پێویستیی و پێشمەرجی هەر ناسیۆنالیزمێکی ئاسایی و خۆپێناسەکردنێکی نەتەوەیی هاوچەرخە. بۆیە هێندەی لەگەڵ ئەوانیدی میهرەبانین رەنگە بەرامبەر بە خۆمان بەو جۆرە نەبین! دۆخی ئێستای هەرێم و هاوکاتی ئەم دیمەنە جوانەش، کە سیخناخە لە ناکۆکی و هەوڵی یەکتر شکاندن هەندێکجاریش بەکارهێنانی زمانێکی نزم لەگەڵ یەکتردا، باشترین بەڵگەیە.

 بۆیە وێڕای نرخاندنی ئەم هەڵوێستە جوانەی هەڵەبجەییەکان بە هەورامانیشەوە، سەرنج رادەکێشین بۆ بایەخی گەورەی زۆرترکردنی ئەم جۆرە رەفتارە رەمزییە گرنگانە لەنێوان شار و ناوچەو زارەکانی باشور و پارچەکانی کوردستانیشدا، بۆئەوەی مزگەوت و کۆمەلگەی مەدەنی و ئیدارەی خۆجێی بەشێ لەو بۆشاییانە پڕبکەنەوە کە سیاسەتی نادروست و خوار نیشتیمانیی دروستی دەکات و نەهێڵن بەهیچ ناوێکەوە بەربەست لەنێوان رۆڵەکانی یەک نەتەوەدا دروست ببێت، بیسەلمێنن سەبارەت بە باشور، دان بە زۆنی حیزبییدا نانێن و لەسەر ئاستی پارچەکانی کوردستانیشدا بیخەنەروو کە بە هەر شتێك بەمان بکرێت، دوو دوو ناکاتە چوار، دەکاتە یەك.