پارساڵ کۆمپانیایەکی کۆریای باشور داوای کرد بڕێک گازی چەمچەماڵی پێ بفرۆشن، ئەویش بیکات بە چەند ناوچەیەکی پیشەسازیی گەورەو، پەیینی کیمیایی و چەند پێکهاتەیەکی دی بەرهەم بهێنن، پرۆژەکە دەیتوانی و دەتوانێت لە قۆناخی یەکەمدا سەروو دە- ملیار دۆلار بهێنێتە هەرێمی کوردستانەوە و بەلای کەمەوە ١٥ پانزە هەزار هەلی کاری ڕاستەوخۆ و ناڕاستەوخۆ درووست بکات، من نوێنەرو نێوەندگیرییان بووم، ئێ بەڵام حیزب لەو زۆنە هەماهەنگ و هاوکار نەبوو! بە کورتیەکەی دەبوو (٥٠٪) ی قازانج بدەیت بە ئیدارەی گشتی حیزب! نایدەی!؟ حیزب هێزی هەیە و، دەینێرێتە سەرت، دادوەری خۆیان هەیەو فەرمانی گرتنت بۆ دەردەکات! [ حەو!] جا سەرمایەو سەرمایەگوزاریی چۆن ڕوودەکاتە وڵاتێک ئیدارەکەی ئاوها بیر بکاتەوە لە سەدەی ٢١ دا !
ئیمڕۆکە- درەنگانێک لە میتینگێکی ئۆنڵاین لەگەڵ چینییەکان تەواو بووین. یەکێک لە بەشداربوەکان کورد بوو، لە ئەوروپا گەڕابۆوە، چوو بوو بۆ ماڵی بابی لە شارەزوور.. ئەو برایەمان یەکسەر وتی ١٢ دۆنم زەوی ماڵی باوکم هەیە، ٢٥- ٣٠ دۆنمی دیکەش دەکڕین و ئەندازیارە چینییەکان بانگ دەکەین و،،، تادوایی. دوای کە تەواو بووین گوتم " ئەی ئیدارەی گشتی !؟".. وتی "ئۆو.. وەڵا بیرم چوو، خۆ ئەوانە ئێستا داوای ٦٠٪ یش دەکەن، نەک ٥٠٪ !"
دیارە هەموو سەرمایەدار و بەڵێندەر و خاوەنکارێک نەک ئێستا ئەوە چەندین ساڵە ئەوە دەزانێت کە هەر تەنانەت جیقنەی مریشکیش بفرۆشیت دەبێت (٥٠٪) ی بدەی بە ئیدارەی گشتی یەکێتی نیشیتیمانیی کوردستان! ئەم شتانە تازە نیین، لە کەرکوکەوە تا مەرزەکان ئەوانە خەریکی هەموو جۆرە کارێکی نا مرۆیی و نا-نیشتیمانیی و نا-یاسایین.
بەڵام ئەوەی نا-خۆشە؛ لە کوردستان لە بری خەڵک فێربن باوەش بەیەکدا بکەن و پێکەوەیی تۆختر بکەنەوە، هەموو بستێكی کوردستان وەک ئەو شوێنی لە دایکبوونەی خۆیان و بەشێک لە بوونی خۆیان بزانن، کەچی حیزبەکان شارچێتی و شەڕە-گەڕەک تۆخ دەکەنەوە! تۆ نابێت زمان هەڵبهێنی دەنا "ووووش .. بەخوا تۆ جەلالیت،، تۆ پاراستنی،، تۆ وا و..واو...
- کورە دەبڕۆ- هەی بچووک، وا دەزانی عالەمێ وەکی خۆت بچووکە، بەر لووتی خۆت نابینی! لای ئەوانە هەموو شتێک تەنهاو تەنها ململانێیەکی بێماناو شارچێتییەکی پڕووپووچە [ قەت گەورە نابن]. لاچۆ لێرە.. لا---چۆ..
سەیری بکە؛ ئێمە خەڵکی چەمچەماڵین، گەورەترین قەزایە لە عێراقیشدا، نیزیکەی ٢٥٠ هەزار نفووسی هەیە بە ٦ ناحیەی گەورەوە، کەچی ٣٣ ساڵە (ی، ن، ک) نەیتوانیوە نەخۆشخانەیەک بۆ ئەو شاری شەهیدان و پایتەختی ئەنفالە درووست بکات!؟ دەیەوێت من بچم شەڕی پارتی دیموکراتی کوردستانی بۆ بکەم، کە لە هەموو ژیانمدا یەک جار چوومەتە دهۆک و بادینان! باشە یانی پارتی ڕێگر بوە لەو هەموو ساڵە یەکێتی نەخۆشخانەیەک بۆ خەڵکی چەمچەماڵ درووست بکات!؟
یانی تۆ لەو دەڤەرە نابێت بڵێی کاکە نەخۆشخانەم نییە، ئاوم نییە ئاو! دەرفەتی کار نییە، ئازادیت نەهێشتوە، کەرکوکت فرۆشتوەو، لەماوەی ئەو کەمتر لە دوو ساڵەدا کە "موحافیز" ت لەلا بوە نیزیکەی ١٨٠ ملیار دینارتان لە پرۆژەکانی کەرکوک دەستکەوتوەو، نوێنەری تایبەتتان لەوێ بۆ دزی و ڕاوێژکاری تایبەتیشتان لە سلێمانی بۆ پرۆژە-بازیی و دەستوەردان لە هەموو شت داناوە، کەچی پێت دەڵێن؛ ووش.. قسە نەکەی، دواییا پێت دەرێن ئەتوو پاراستنی، لۆیە وا قسە دەکەی! دە..بڕۆۆۆۆۆ. هەو نییم، بەس ئا -- هەوم و دەی دەستیشم خۆش بێت.. خۆزگە زانیاری و پاراستن بام و بەس گوێیان لەو خەرمانە دیراسەو پێشنیارە نیشتیمانی و ئابوریی و ستراتیجیانەم گرتبا لەو هەموو ساڵەی ڕابردوو..!
ئنجا لای پارتیش؛ وە نەبێت گوتارێکی ڕێک و پێکی لایەنی کەمی میدیایی هەبێت، لە بری نوخبەی سیاسی و بازرگانەکانی میدیا لە سلێمانی بە ئامانج بگرن، ڕێک دێن ناوی "سلێمانی" دەهێنن و، سلێمانی بە ئامانج دەگرن! پارتی دیموکراتی کوردستان هێشتا نەک ستراتیژێکی نیشتیمانیی بۆ کەرکوک نییە بەڵکو بۆ ئۆرگانەکانی خۆشی نییەتی لە کەرکوک! لە بەغداش هەڵە-لە دوای- هەڵە دەکات. ئەوجا زۆرینەی بەرپرس و پەرلەمانتاری پارتی لەبری خۆیان دابەزنە ناو خەڵکی و گفتوگۆ بکەن، وا دەزانن ئەوان خاوەنی مایکرۆسۆفت و ستارلینکن! زۆربەیان لەسەر بنەمای ئەوەی بێ ئەزموون و نەزانن کراون بە شت، هێندەش لووت بەزر و خۆ-بەشتزانن! قەپۆزت بە ئاسمانێدا کردوە، هەتیو تۆ چیت ئەگەر "بارزانی" نەبێت!؟
بەڵام لە کۆتاییدا؛ دیارە کێ زۆرترین خزمەتگوزاریی کردوە، کێ باشترین رێگاو تونێلی درووستکردوە. ئەی کێ دار سنەوبەرەکانی لە سلێمانی سوتاندو جێگەکەی کرد بە پرۆژە بۆ کوڕ و کچی فڵان و فیسار، ئەی کێیە خەریکە ٥ پێنج ملیۆن دار بە چواردەوری هەولێردا دەنێژێت و جۆرەها پشتێنەی سەوزایی درووست دەکات!؟ بۆچی ئاوی دوکان دەگاتە قووشتەپەو ئیدارەی هەولێر جێبەجێی دەکات، بەڵام چەندین دەیەیە ئاو لە گۆپتەپەوە ناگاتە چەمچەماڵ!؟ کاکە پارتی لە هەولێرێ کارخانەی مۆبایلی هێناوە، لێی دەنووسن؛ مەید ئین کوردستان.. ئەدی ئەتوو نەبووی کارگەی ماددەی هۆشبەرو کاپتاگۆنت لە دەربەندیخانێ دانابو!؟ ماهیری برای بەشار ئەسەدی سوریا هەواڵی لە دەست ئەنگۆ دابوو بە حوکمڕانانی عێراقێ؛ بابە ئەوەی داخەن لە دەربەندیخانێ، بازاڕی ئێمەی کز-کز کردیە !
ڕێگەی سەرەکی تەکیە- سلێمانی [ کە لە سلێمانی دەچیتە ناو تەکیەی کاکەمەند] هەموو عێراق دەبەستێت بە سلێمانییەوە، تەنها (٣٠٠م) سێ سەت مەتر قیری پێویستە زیاتر لە دە ساڵە تاسەکانی قووڵ و تایە-شکێنەو کەس چاکی ناکات!؟ تاسە هەیە تەمەنی پانزە ساڵە لەو شارەدا هێشتا چاک نەکراوە! کەچی بەرپرسەکانی ئەوێندەر قاتی شاڵ و تەزبیحی دەنک گەورە وە-دەستەوە دەگرن و پێشوازی لە سەدان خزم و کەس دەکەن، گوایە دیوەخانیان داناوە! دە-لاچۆ... لاچۆۆ...
تەماشا...تەماشا چ مایک بەدەستییان ڕاگرتییە، چ سایت و دەزگای بەناو ئیعلامییان داناوە؛ کرێگرتە، داشۆراو، جاسووس، مافیای میدیایی، بازرگانی میدیایی، جاشی پاسداران و حەشد، ئیتر هەشیانە کایەی میدیا بە لەشفرۆشخانە تێگەیشتوە [ بابە،، ئەمە میدیایەو دەستەڵاتی چوارەمە]؛ ئەوجا بەس چەلەحانێ و جنێوی دەزانن، باشترین چەکی دەستتان جنێو.. وە..جنێو؛ بە زەڕەبین بگەڕێ "مەعریفە"یەک نادۆزیتەوە؛ هەر هەندێ عەصاباتی ئیعلامین و تەواو! نیشتیمانپەروەرییەک نابینی، بۆ کەس دەوێرێ بڵێ "کوردستان!" یەکسەر دەڵێن؛ ئەتوو دیارە بە ئاوازی کێ هەڵدەپەڕی!
جیهان خەریکە مووشەکی بالیستیی کیشوەر بڕ بۆ یەکدی دەکڕن و لە ژێر ئاودا دەیشارنەوە، هەزاران پاکێجی زیرەکی دەستکردو تەکنەلۆژیای دیجیتاڵ، سەدان ملیۆن دۆنمە زەوی کراوە بە کیڵگەی وزەی خۆر، زانیارییەکان لەناو هەورەکاندا دەشارنەوە، کاسەی سەری مرۆڤ ئاڵوگۆڕی پێدەکرێت و، سیستەمە جیهانییەکە بە هەزارەها داهێنانی زانستی و بەرەو پێشچوونی خەیاڵی لە قاڵبدراوەتەوە. ئێمەش تازە- تازە دانیشین لە کۆتایی هەموو گفتوگۆ و بەشدارییەکی دەرەکیدا، بڵێین؛ ئەه،، ئەی ئەمە نابێت، چوونکە ئیدارەی گشتی ٥٠٪ ی دەوێ؟ ئاخەر تۆ کێیت و بۆچی پەنجا لەسەتت بیەمێ! کەچی هەر ئەیانیەنێ! مەیانیەنێ..کاکە تۆزێک بەخۆتاندا بچنەوە؛ لە هەموو دونیادا لە سەدات ١٠ بۆ ١٥ ەیەک "باج" هەر هەبوەو ئەوەش دەدرێتێ بە حکومەت نەک حیزب؛ لەهەموو دونیادا حیزبی حوکمڕان شتێکی هەر دەبێت دەستبکەوێت و، بەرژەوەندیی هەیە؛ نەک وەک ئێوە لە بندا دەیبڕن!
لە ئاستە سیاسییەکەشدا، تا بڵێی لۆکاڵ و سواو بیردەکەنەوە، ئەمە وا و، ئەوە وا و.. لەوەتەی هەن شت تێک دەدەن، بەس تێکدان و جیاکاریی دەزانن، لەوەتەی هەشن دۆڕاو بوون؛ سەیرێکی بکە؛ کورد هەزاران ساڵ خەباتیکردو و خوێنی بەخشی، تا لە سەرەپێچێکی مێژوودا ئۆتۆنۆمییەک (ئەم هەرێمی کوردستان) و خۆ-بەڕێوەبەرییەی درووستکرد، کەچی ئەوانە توێژینەوەیەکیان کردوە، سەرئەنجامەکەی تیای نوسراوە [ وا باشە هەرێمی کوردستان بکرێت بە دوو ئیدارەیی!], کو خەمی نەخۆم چاوی من.. سیان لەو توێژەرە حەکیمانە قەدیم چوارساڵ مامۆستای من بوون! ئنجاش وەکی دەبینن دوو ساڵە ناهێڵن حکومەت لەو هەرێمە پێک بێت، چوونکە پۆستێک هەیە نایاندرێتێ!
ئەها..هەر-دەڵێی تەلەفزێۆن زیادەیە لە ماڵی مە؛ ئەو ڕۆژە پێم کرد، یەک لەوانە ڕیباتی سووری بەستابو؛ دەیگوت؛ دەبوایە دەمێکە خاوەنی دەستوورێک باین! ئاخەر عەزیزم، هەی عەزیزم بۆ پێمان ناڵێی کێ بوو نەیهێشت ببینە خاوەنی دەستوور!؟ نەوشیروان مستەفا نەبوو؟! ئەدی ڕەشنووسەکەش لە پەرلەمان نەخرایە دەنگدانەوە، ئەنگۆ نەتانهێشت ببینە خاوەنی ئەو دەستوورە!؟ قەدیم گۆتیتم؛ وەڵڵاهی، وەبیلاهی ئێوە سەرچاوەی هەزار دەرد و بەڵان لە مێژووی مە دا! تۆ نازانی شۆستەیەک درووست بکەی، تاسەیەکت پێ چاک ناکرێ؛ چۆن گوایە کاری گەورەترت لێدەوەشێتەوە!؟
تۆ ویژدانت تۆ سەرمایەدارێکی فەڕەنسی، ئەمریکیی، فیلەندی یان کۆری بیت، ڕوو دەکەیتە فەزایەکی وەهاوە!؟ سەرمایە چۆن ڕوودەکاتە جێگەیەکی واوە!؟ دە- بڕۆن دەی سەرمایەداران و جەریدەنووسانی زۆنە- ئازادەکە؛ ئەوە ئەو تۆزە قسەیەشم بۆ کردن، کە خۆتان ناوێرن بیڵێن، دەزانم ئێستا بە وەتس ئەپ لۆ یەکدی دەنێرن!
با دوو بارە ناوی خۆم بنووسمەوە: بەهرۆز جەعفەر.