ئەم گەرووە تەنها ڕێڕەوێکی ئاوی نییە، بەڵکو دەمارێکی سەرەکیی گیرفانی جیهانە. ڕۆژانە نزیکەی ٢٠ ملیۆن بەرمیل نەوتی پێدا تێپەڕ دەبێت. بۆ وڵاتانی وەک عێراق و سعودیە، ئەمە تاقە دەرگای ماڵەکەیانە بۆ فرۆشتنی کاڵاکانیان. ئەگەر ئەم دەرگایە داخرێت، نرخەکان لە جیهاندا دەگەنە ئاستێکی بڕوانەکراو؛ هەر بۆیەش جیهان چاوی لەسەر ئەم ناوچە بچووکەیە.

ئێران کە دەستی بەسەر کەناراوەکاندا دەگات، هەمیشە وەک هەڕەشەی کۆتایی باسی داخستنی ئەم شوێنە دەکات. ستراتیژی تاران لێرەدا پشت بە جەنگی ڕووبەڕوو نابەستێت، چونکە دەزانێت توانای بەرگەی کەشتیگەلە زەبەلاحەکانی ئەمریکای نییە. لە جیاتی ئەوە، پلانیان وایە بە مینی دەریایی، فڕۆکەی بێفڕۆکەوان و بەلەمی خێرا، ئاسایشی گەرووەکە بشێوێنن. ئامانجەکە ئەوەیە کۆمپانیاکانی گواستنەوە ئەوەندە بترسن کە چیتر نەوێرن کەشتی بنێرن، تا وڵاتە کڕیارەکان ناچار بن لەگەڵ ئێران ڕێکبکەون بەڵام ئەمریکا بە بێدەنگی سەیری ئەم یارییە ناکات. 

واشنتۆن تەنها چاوەڕێی ساتێک دەکات کە ئێران هەڵەیەکی کوشندە بکات؛ هەر جۆرە هەوڵێک بۆ داخستنی گەرووەکە بە یەکجاری، دەبێتە باشترین بیانوو بۆ ئەمریکا تا نەک هەر هێرش بکات، بەڵکو تەواوی دەوروبەری گەرووەکە بکاتە ئامانجی سەربازی و هێزی زەبەلاحی تێدا جێگیر بکات. لەو کاتەدا، واشنتۆن بە کردەیی دەست بەسەر تەواوی ڕێڕەوەکەدا دەگرێت. بەمەش ئێران نەک هەر کارتە گوشارەکەی دەدۆڕێنێت، بەڵکو باڵادەستییەکەی بەسەر کەناراوەکانی خۆیشیدا لەدەست دەدات و دەبێتە تەماشاکەری جێگیربوونی هەمیشەیی ئەمریکییەکان لەناو جەرگەی ئاوەکانیدا.

ئەم کارە بۆ خودی ئێرانیش وەک خۆکوشتن وایە. تاران بۆ بژێوی ژیانی خەڵکەکەی پێویستی بە فرۆشتنی نەوت هەیە؛ ئەگەر گەرووەکە دابخات، یەکەم کەس کە دەخنکێت خۆیەتی، چونکە ڕێگەی نانی خۆی دەبڕێت. جگە لەوەش، وڵاتانی وەک چین کە کڕیاری سەرەکیی نەوتی ئێرانن، هەرگیز ڕێگە نادەن بەرژەوەندییەکانیان بکەوێتە مەترسییەوە. بۆیە ئەگەر تاران ئەم کارە بکات، تەنانەت دۆستەکانیشی لێی هەڵدەگەڕێنەوە و لە ڕووی سیاسییەوە بەتەواوی تەنها دەمێنێتەوە.

لە لایەکی ترەوە، وڵاتانی ناوچەکە بە خێرایی خەریکی کێشانی نەخشەیەکی نوێی وزەن. لە ڕێگەی بۆریی ستراتیژییەوە دەیانەوێت نەوتەکەیان بگەیەننە کەناراوەکانی دەریای سوور و عەمان، بەبێ ئەوەی پێویستیان بە تێپەڕبوون بە ناو گەرووی هورمزدا هەبێت. ئەم جووڵەیە تەنها گۆڕینی ڕێڕەو نییە، بەڵکو بە کردەیی پووچەڵکردنەوەی ئەو کارتە فشارەیە کە تاران دەیان ساڵە وەک چەکی کۆتایی یاری پێ دەکات.

لە کۆتاییدا، ئەم گەرووە بۆ تاران تەنها وەک وەهمی هێز ماوەتەوە؛ چونکە بەکارهێنانی کردەیی ئەو کارتە، قومارێکی دۆڕاوە کە تێیدا تاران هەموو سەرمایە سیاسییەکەی دەسوتێنێت؛ ئەوەش بێگومان ئەگەر تا ئەو کاتە لەژێر لێدانە بەردەوام و بێبەزەییانەکانی ئیسرائیل و ئەمریکادا، شتێک مابێتەوە بە ناوی دەسەڵات لە تاران.