هەرێم نیوز
سەرۆکایەتیی ئەنجوومەنی وەزیرانی هەرێمی کوردستان ڕوونکردنەوەیەک لەبارەی سەردانەکەی سەرۆکی دەستەی حەشدی شەعبی بڵاودەکاتەوە و ڕایدەگەیەنێت، ئەو دەنگۆیانەی لەبارەی ناوەڕۆکی کۆبوونەوەکانی لە هەندێک دەزگای ڕاگەیاندندا بڵاوکراونەتەوە، دوورن لە ڕاستییەوە.
ئەمڕۆ یەکشەممە، 22ـی 11ـی 2026، سەرۆکایەتیی ئەنجوومەنی وەزیرانی هەرێمی کوردستان لە ڕوونکردنەوەیەکدا بڵاویکردەوە، دوێنێ شەممە، 21ـی 11ـی 2026، لە میانی سەردانەکەی فالح فەیاز، سەرۆکی دەستەی حەشدی شەعبی بۆ هەرێمی کوردستان و کۆبوونەوەکانی لەگەڵ بارزانی، نێچیرڤان بارزانی، سەرۆکی هەرێمی کوردستان و مەسروور بارزانی، سەرۆکی حکوومەتی هەرێمی کوردستان، گفتوگۆ لەبارەی گرنگیی چارەسەرکردنی کێشە هەڵپەسێردراوەکانی نێوان هەرێمی کوردستان و حکوومەتی فیدراڵی کراوە، بەتایبەتی دۆسیەکانی بودجە، نەوت و دەروازە سنوورییەکان.
لە ڕوونکردنەوەکەدا ئاماژە بەوەش کراوە، لە هەندێک دەزگای ڕاگەیاندندا زانیاریی ناڕاست و بێبنەما سەبارەت بە ناوەڕۆکی کۆبوونەوەکان بڵاوکراونەتەوە، کە هیچ بنەمایەکیان نییە و دوورن لە ڕاستییەوە.
سەرۆکایەتیی ئەنجوومەنی وەزیران جەختی لەوەش کردووەتەوە، بە پێچەوانەی ئەو دەنگۆیانەوە، هەموو لایەک لە کۆبوونەوەکاندا هاوڕا بوون لەسەر ئەوەی پێویستە کێشەکانی نێوان هەرێمی کوردستان و حکوومەتی فیدراڵی لە ڕێگەی گفتوگۆ، لەیەکتێگەیشتنی هاوبەش و لە چوارچێوەی دەستووردا چارەسەر بکرێن.