دواین هەواڵ

ڕاپۆرت و چاوپێکەوتن‌

 7 کاتژمێر پێش ئێستا

گەرووی هورمز گڕ دەگرێت و زەنگی مەترسی لە بەحرەین لێدەدرێت

هەرێم نیوز

سوپای پاسداران خستنەخوارەوەی فڕۆکەیەکی دیکەی بێفڕۆکەوانی ئەمریکی و تەقینەوەی چەند کەشتییەکی نەوتهەڵگر بەهۆی مینی دەریاییەوە ڕادەگەیەنێت؛ لە بەرامبەردا دەوحە هەوڵی ناوبژیوانی دەدات و تارانیش گەمارۆی ئابووری بە «کردەوەی جەنگی» ناودەبات

گرژییە سەربازییەکانی کەنداو و گەرووی هورمز قۆناغێکی مەترسیدارتریان تێپەڕاند؛ سوپای پاسدارانی ئێران هێرشکردنە سەر دوو بنکەی سەربازیی ئەمریکای لە بەحرەین ڕاگەیاند، هاوکات سەرەڕای پاراستن و یاوەریکردنی هێزە دەریاییەکانی ئەمریکا، چەند کەشتییەکی نەوتهەڵگر لە گەرووی هورمز کرانە ئامانج و ئاگریان تێبەربوو.

وەزارەتی ناوخۆی بەحرەین ڕۆژی شەممە بڵاوی کردەوە کە لە ئەنجامی هێرشێکی ئێراندا، ئاگر لە دامەزراوەیەکی پیشەسازیی مەدەنی کەوتووەتەوە و تیمەکانی بەرگریی شارستانی سەرقاڵی کۆنترۆڵکردنین، بێ ئەوەی هیچ زیانێکی گیانی تۆمار بکرێت. هاوکات دانیشتووانی دوورگەی «ستره» لە ڕۆژهەڵاتی بەحرەین، کە پاڵاوگەی نەوتی «باپکۆ»ی لێیە، باسیان لە بیستنی دەنگی تەقینەوەیەکی بەهێز و بەرزبوونەوەی دووکەڵ کردووە.

ئەم پەرەسەندنانە دوای ئەوە دێن کە وەزارەتی ناوخۆی ئەو وڵاتە زەنگی ئاگادارکردنەوەی لە بوونی «هەڕەشەیەکی نزیک» لێدا و داوای لە دانیشتووان کرد بچنە شوێنە پارێزراوەکان.

تێکشکانی پاراستنی دەریایی ئەمریکا و مینڕێژکردنی هورمز:
لە لایەکی ترەوە، ئاڵۆزییەکانی گەرووی هورمز گەیشتوونەتە ئاستی پێکدادانی ڕاستەوخۆ؛ بەپێی ڕاگەیەندراوەکانی دەستەی کاروباری بازرگانیی دەریایی بەریتانیا، دوو کەشتیی نەوتهەڵگر لە نزیک کەناراوەکانی شاری «خەسەب»ی سەر بە سەڵتەنەتی عومان بە مووشەک و تەقەمەنیی نەناسراو پێکراون و زیان بەر بەشی دواوە و ژووری بزوێنەرەکانیان کەوتووە.

تەلەڤزیۆنی فەرمیی ئێرانیش گڕگرتنی کەشتییەکی نەوتهەڵگری بەهۆی بەرکەوتنی بە مینێکی دەریایی لە ڕۆژهەڵاتی هورمز پشتڕاست کردەوە. هێزی دەریایی سوپای پاسداران لە بەیاننامەیەکدا هۆشداریی توندی دا و ڕایگەیاند کە «هەوڵەکانی سوپای ئەمریکا بۆ کردنەوەی ڕێگە و تێپەڕاندنی کەشتییەکان شکست دەهێنێت و هەر کەشتییەک بەبێ مۆڵەت و لە ڕێڕەوی نایاساییەوە تێپەڕێت، ڕووبەڕووی مینی دەریایی و وەڵامی توند دەبێتەوە». هاوکات سوپای پاسداران خستنەخوارەوەی ٥٨ـەمین فڕۆکەی بێفڕۆکەوانی ئەمریکیی لە جۆری «MQ-9» لە ئاسمانی دوورگەی قەشم ڕاگەیاند.

هەوڵە دیپلۆماسییەکانی قەتەر و هەڵوێستی تاران:
لە گۆڕەپانی دیپلۆماسیشدا، تاران ئاشکرای کرد کە شەوی هەینی شاندێکی قەتەری سەردانی ئێرانی کردووە و بۆ ماوەی دوو کاتژمێر لە چوارچێوەی هەوڵەکانی ناوبژیوانیی دەوحە لە نێوان ئێران و ئەمریکادا گفتوگۆیان کردووە.
کازم غەریب ئابادی، جێگری وەزیری دەرەوەی ئێران، دوای کۆبوونەوەکە جەختی لەوە کردەوە کە «تاران گەمارۆی ئابووری و دەریایی بە کردەوەیەکی جەنگی دەزانێت و هەموو ڕێکارێکی پێویست بۆ تێکشکاندنی دەگرێتە بەر». هاوکات حەمید ڕەزا حاجی بابایی، جێگری سەرۆکی پەرلەمانی ئێران، ئەو وڵاتانەی ناوچەکەی بە بەرپرسیار زانی کە ڕێگەیان بۆ بوون و دەستوەردانی سەربازیی ئەمریکا خۆش کردووە.
جێی ئاماژەیە، لە کۆتایی مانگی شوباتی ئەمساڵەوە و دوای هێرشەکانی ئەمریکا و ئیسرائیل بۆ سەر ئێران، هاتوچۆی دەریایی لە گەرووی هورمز کە پێش جەنگ پێنجیەکی نەوتی جیهانی پێدا تێپەڕ دەبوو، تووشی پەککەوتنێکی گەورە بووە؛ تاران گەرووەکەی کۆنترۆڵ کردووە و واشنتنیش گەمارۆی دەریایی خستووەتە سەر بەندەرەکانی ئێران.



Copyright © 2020 All Rights Reserved Designed And Developed By AVESTA GROUP