هەرێم نیوز
عەباس عێراقچی، وەزیری دەرەوەی ئێران ئاشکرای کرد کە تاران دەستبەرداری هەموو هێڵە سوورەکان دەبێت ئەگەر جارێکی تر دەستدرێژیی بکرێتە سەر، هەروەها جەختی کردەوە هەر وەڵامدانەوەیەکی سەربازییان بە شێوەیەکی یەکلاکەرەوە و وێرانکەر دەبێت لە بەرامبەر هەر لایەنێک کە هێرش بباتە سەریان.
کاردانەوە بەرامبەر هەڵوێستی ئەڵمانیا
ئەمڕۆ، ٣١ی تشرینی یەکەمی ٢٠٢٦، عەباس عێراقچی، وەزیری دەرەوەی ئێران لە تۆڕی کۆمەڵایەتیی "ئێکس" نووسیویەتی، فرێدریش مێرتس، ڕاوێژکاری ئەڵمانیا پێشوازیی لە هێرشی ئاسمانیی ئەمریکا و ئیسرائیل بۆ سەر ئێران دەکات، هەروەها دووپاتی لەوەش کردەوە کە ئەمریکا بە نوێنەرایەتیی ئەورووپا کارێکی سەرشێتانە ئەنجام دەدات.
ئاماژەی بەوەش داوە کە بڕی ١٠٠ ملیار یۆرۆ ناکرێت بەراورد بکرێت بە وەڵامدانەوەیەکی یەکلاکەرەوە و وێرانکەر کە لە لایەن هێزە چەکدارەکانی ئێرانەوە ئەنجام دەدرێت لە دژی هەر هێرشێک بکرێتە سەر وڵاتەکەی.
نەمانی هێڵە سوورەکان و ئامادەکاری بۆ هێرشەکان
لە بەشێکی دیکەی وتەکانیدا، عێراقچی گوتی: "ئێران چیتر هیچ هێڵێکی سووری نییە و بە توندی مامەڵە لەگەڵ هەر هەڕەشە و دەستدرێژییەک دەکات کە ئاسایش و ئارامیی خاک و خەڵکی ئێران تێک بدات."
ئەم قسانەی وەزیری دەرەوەی ئێران لە کاتێکدان کە سەرچاوە هەواڵگری و میدیاییەکان دووپات لەوە دەکەنەوە، دوای هەڵبژاردنی نیوەی خول لە ئەمریکا کە بڕیارە لە ٣ی تشرینی دووەم/نۆڤێمبەر (واتە سێ ڕۆژی دیکە) ئەنجام بدرێت، ئەمریکا و ئیسرائیل هێرشێکی چڕ و فراوان دەکەنە سەر ئێران.