لە وەرچەرخانێکی ئابووریی نەرێنیدا بۆ شانشینی یەکگرتوو، شەپۆلێکی بەرفراوانی هەڵاتنی ملیاردێر و دەوڵەمەندەکان بەریتانیای گرتووەتەوە. بەپێی ئامارەکانی ئاژانسی «بڵومبێرگ»، لە ماوەی دوو ساڵی ڕابردوودا بە بڕی ١٦٠ ملیار دۆلار لە سامان و سەرمایەی گەورە یاخود وڵاتەکەیان جێهێشتووە یان وەبەرهێنانەکانیان لە نێو بەریتانیادا بە شێوەیەکی بەرچاو کەمکردووەتەوە.
هۆکاری ئەم کۆچە گەورەیەی سەرمایە بۆ سەپاندنی باجی بەرزی بێوێنە لەلایەن حکومەتەوە دەگەڕێتەوە، هاوشانی شۆکە یەک لەدوای یەکەکانی ئابووری و ناسەقامگیریی سیاسی کە دۆخێکی نادڵنیایی قووڵیان لای سەرمایەداران دروستکردووە. ئەم دۆخە مەترسییەکی گەورە لەسەر خەزێنەی دەوڵەت پێکدەهێنێت، چونکە بەپێی داتاکانی دەستەی باج و گومرگی بەریتانیا، ئەو ١٪ دەوڵەمەندەی کە وڵاتەکە جێدەهێڵن نزیکەی ٢٧٪ـی سەرجەم داهاتی باجی داهات لە سەرتاسەری بەریتانیادا دابین دەکەن.
لێکەوتەکانی ئەم تەنگژەیە ڕاستەوخۆ بەسەر کەرتی خانووبەرەی شاهانە و گرانبەهای شاری لەندەندا ڕەنگی داوەتەوە؛ بەپێی دامەزراوەی «Savills»، نرخی خانووبەرە لووتکەکان لە ساڵی ٢٠١٤ـەوە بە ڕێژەی ٢٧٪ دابەزیوە، بەڵام ئەگەر ڕێژەی هەڵاوسانیش لەبەرچاو بگیرێت، وەک بڵومبێرگ ئاماژەی پێداوە، دابەزینەکە دەگاتە نزیکەی ٤٩٪، کە ئەمەش بە مانای لەدەستدانی نزیکەی نیوەی بەهای تەواوی ئەو موڵکانە دێت.
قەیرانەکە تەنیا لە چینی دەوڵەمەنددا نەوەستاوەتەوە، بەڵکو بەپێی دامەزراوەی «S&P Global»، بازاڕی کاری بەریتانیا درێژترین شەپۆلی پاشەکشەی لە دوای دەستپێکردنی تۆمارکردنی داتاکانەوە لە ساڵی ١٩٩٧ـەوە تۆمار کردووە، بە جۆرێک کۆمپانیاکان بۆ ماوەی ٢٤ مانگی لەسەریەک ناچار بوون ژمارەی کارمەند و کارمەندەکانیان کەم بکەنەوە، کە ئەمەش قووڵیی ئەو تەنگژە ئابوورییە دەسەلمێنێت کە بەرۆکی بەریتانیای گرتووە.