هەرێم نیوز
ئەمڕۆ شەممە، ٢٦ی ئەیلوولی ٢٠٢٦، کاروانێکی تری ڕووفاتی قوربانییانی ئەنفال کە لە ١٥٣ ئەنفالکراو پێکهاتوون، بە ئامێزی نیشتمان شاد دەبنەوە.
ئامادەکارییەکان بۆ ڕادەستکردنی ڕووفاتەکان
دامەزراوەی شەهیدان و پزیشکی دادی ئامادەکاری بۆ ڕادەستکردنی ١٥٣ ڕووفاتی ئەنفال بە هەرێمی کوردستان دەکەن.
لە چوارچێوەی هەوڵەکان بۆ ئاشکراکردنی چارەنووسی بێسەروشوێنکراوان و دۆزینەوەی ڕووفاتی گۆڕە بەکۆمەڵەکان و ئەنفالکراوان، ئەمڕۆ بەڕێوەبەرایەتیی پاراستنی گۆڕە بەکۆمەڵەکان و بێسەروشوێنکراوانی سەربە دامەزراوەی شەهیدان، بە هاوکاریی پزیشکی دادی، ئامادەکارییان بۆ ڕادەستکردنی کاروانێکی تری ڕووفاتی شەهیدانی گۆڕە بەکۆمەڵەکان کردووە کە ژمارەیان ١٥٣ ڕووفاتە.
سەرجەمی ١٥٣ ڕووفاتەکە لە ژن و منداڵ پێکهاتوون کە قوربانیی پرۆسەکانی ئەنفالن و لەلایەن ڕژێمی پێشووەوە شەهید کراون. سەرجەم ئەو ڕووفاتانە ڕادەستی لایەنە پەیوەندیدارەکانی هەرێمی کوردستان دەکرێن، بە مەبەستی گواستنەوە و ناشتنی کاتیی.
دۆزینەوە لە بادیەی سەماوە
ڕووفاتەکان پێشتر لەلایەن تیمەکانی گەڕان و پشکنین لە یەکێک لە گۆڕە بەکۆمەڵەکانی ناوچەی بادیەی سەماوە دۆزرابوونەوە. ئەو شوێنانە تایبەت بوون بە قوربانییانی شاڵاوی ئەنفال کە لەلایەن ڕژێمی پێشوو هێرشیان کرابووە سەر.
دۆزینەوە و دەرهێنانی ئەم ڕووفاتانە لە سنووری سەماوە، لە چوارچێوەی بەدواداچوونە بەردەوامەکانی دەزگای شەهیدان و فەرمانگەی پاراستنی گۆڕە بەکۆمەڵەکان دێت، بە مەبەستی ئاشکراکردنی چارەنووسی قوربانییانی پرۆسەکانی ئەنفال کە لەلایەن ڕژێمی پێشووەوە زیندەبەچاڵ کرابوون، هەروەها هاوئاهەنگی لەگەڵ لایەنە پەیوەندیدارەکانی هەرێمی کوردستان بەردەوامە.