هەرێم نیوز
عەباس عێراقچی، وەزیری دەرەوەی ئێران لە نیویۆرک ڕایگەیاند کە لە ڕێگەی نێوەندگیرەکانەوە پێشنیازێکی نوێیان پێشکەشی ویلایەتە یەکگرتووەکانی ئەمریکا کردووە، کە مۆڵەتی حەوت ڕۆژ دەداتە واشنتن بۆ جێبەجێکردنی کۆمەڵێک مەرجی دیاریکراو لە بەرامبەر دەستپێکردنەوەی دانوستانەکان و کردنەوەی گەرووی هورمز.
وردودرشتی هەواڵ
وەزیری دەرەوەی ئێران لە میانی گفتوگۆی لەگەڵ ژمارەیەک لە ڕۆژنامەنوسان و پسپۆڕان ڕوونی کردەوە کە ئەم پێشنیازە لەم هەفتەیەدا گەیشتووەتە دەست بەرپرسانی باڵای ئەمریکا، وادەی جێبەجێکردنە حەوت ڕۆژییەکەش لە ڕۆژی دوای پەسەندکردنی فەرمیی پێشنیازەکەوە لەلایەن کۆشکی سپییەوە دەست پێ دەکات.
هەرچەندە عێراقچی وردەکاریی تەواوی مەرجەکانی ئاشکرا نەکرد، بەڵام جەختی کردەوە داواکارییەکان لە چوارچێوەی لێکتێگەیشتنی مانگی حوزەیرانی ئیسلام ئاباد دەرناچن، کە بەندەکانی تایبەت بوون بە سووککردنی سزاکان، ئازادکردنی پارە و داراییە سڕکراوەکانی ئێران و ڕاگرتنی ئۆپەراسیۆنە سەربازییەکان بە لوبنانیشەوە.
ناوبراو ئاماژەی بەوەش کرد: "تاران پەلەی نییە، بەڵام پێی باشترە پێش هەڵبژاردنەکانی نیوەی خولی ئەمریکا لە مانگی تشرینی دووەمدا بڕیار لەسەر ڕێککەوتنەکە بدرێت".
لێدوانی پەیوەندیدار
عەباس عێراقچی ڕاشیگەیاند: "پێشنیازەکە وادەیەکی حەوت ڕۆژەی بۆ ئەمریکا دیاری کردووە تاوەکو داواکارییە دیاریکراوەکان جێبەجێ بکات، لە بەرامبەردا گفتوگۆکان دەست پێ دەکەنەوە و گەرووی هورمز دەکرێتەوە. ئیمە چاوەڕوانی وەڵامی لایەنی ئەمریکین و پەلەمان نییە، بەڵام ئەم بژاردە دەتوانێت ڕێگە بۆ ڕێککەوتنی کۆتایی خۆش بکات".
لای خۆیەوە دۆناڵد ترەمپ، سەرۆکی ویلایەتە یەکگرتووەکانی ئەمریکا، ئاماژەی بە بەڕێوەچوونی کۆبوونەوەی نێوان هەردوو شاندەکە کرد و لە لێدوانێکدا بۆ ڕۆژنامەنوسان گوتی: "دیداری نێوان بەرپرسانی ئەمریکا و ئێران کە بۆ ماوەی سێ کاتژمێر بەردەوام بوو، کۆبوونەوەیەکی زۆر باش بوو".
پاشخانی هەواڵ
ئەم هەنگاوە دیپلۆماسییە دوای ئەوە دێت کە ڕۆژی سێشەممەی ڕابردوو، عێراقچی لە نیویۆرک لەگەڵ ستیڤ ویتکۆف، نێردهی تایبەتی ئەمریکا کۆ بووەوە و مەرجەکانی تارانی بۆ کۆتاییهێنان بە گەمارۆی دەریایی و کردنەوەی گەرووی هورمز پێ ڕاگەیاند.