سی ئێن ئێن: پشتیوانییە هەواڵگرییەکانی چین توانای ئێرانی لە پێکانی وردی بنکە و کەشتییە جەنگییەکانی ئەمریکادا بەرزکردووەتەوە
لە ئاشکراکردنێکی هەواڵگریی نوێدا، تۆڕی هەواڵی «سی ئێن ئێن» (CNN) لەسەر زاری چوار سەرچاوەی ئاگادار لە نوێترین هەڵسەنگاندنی دەزگای هەواڵگریی ئەمریکاوە بڵاویکردەوە کە وێنەی مانگە دەستکردەکان و پشتیوانییە جوگرافییەکانی چین ڕۆڵێکی یەکلاکەرەوەیان هەبووە لەوەی ئێران بتوانێت هێرشی زۆر ورد بکاتە سەر بنکە سەربازییەکانی ئەمریکا لە ڕۆژهەڵاتی ناوەڕاست و گەرووی هورمز بخاتە ژێر هەڕەشەیەکی ڕاستەوخۆوە.
بەپێی هەڵسەنگاندنە هەواڵگرییەکەی ئەمریکا، دەستکەوتنی ئەم داتایانە لە چەند مانگی ڕابردوودا بازدانێکی بەرچاوی لە توانای بەئامانجگرتنی هێزەکانی تاراندا دروستکردووە؛ لەوانەش هێرشەکەی مانگی تەمووزی ڕابردوو بۆ سەر بنکەی سەربازیی ئەمریکا لە ئوردن کە بووە هۆی کوژرانی سێ سەربازی ئەمریکی. بەرپرسانی واشنتن لەو بڕوایەدان ئەو هێرشە هێندە بە وردی پێکراوە کە ئەگەر زانیاری و وێنەی مانگە دەستکردەکانی چین نەبووایە، ئێران بە هیچ شێوەیەک توانای ئەنجامدانی کارێکی وەهای نەدەبوو.
هاوکات لە گەرووی هورمزدا، داتا جوگرافییەکانی پەکین دەرفەتی داوەتە تاران تا چاودێرییەکی وردی جوڵەی کەشتییە بازرگانییەکان و ئەو کەشتییە جەنگییە ئەمریکییانە بکات کە هاوەڵییان دەکەن. ئەم هاوکارییە فەزاییە ڕێگەی بە سوپای ئێران داوە تەنانەت درۆنی سادەی گەڕان بەدوای گەرمیش (Heat-seeking) بەکاربهێنێت؛ فڕۆکەگەلێک کە لە کاتی فڕیندا ئاراستە ناکرێن، بەڵام بەهۆی دیاریکردنی کاتی زۆر وردی هەڵدانیان بەپێی وێنە ئاسمانییەکان، بە سەرکەوتوویی ئامانجەکانیان لەناو ڕێڕەوە ئاوییەکەدا دەپێکن.
سەرچاوە ئاگادارەکان ئاماژە بەوە دەکەن کە هەرچەندە چین بەهۆی ترسی بەرزبوونەوەی نرخی نەوتی جیهانی خوازیاری تەقینەوەی دۆخەکە لە گەرووی هورمز نییە، بەڵام خستنەبەردەستی ئەم داتا هەواڵگرییانە بووەتە چەک و تاکتیکێکی نوێ بەدەست تارانەوە بۆ باڵادەستکردنی هەژموونی خۆی و دەستوەردان لە هاوسەنگییە سەربازییەکانی ناوچەکەدا.
بۆ يەشی راپۆرت بەگرافیکیش دیبنین