ھەرێم نیوز
مارکۆ ڕوبیۆ، وەزیری دەرەوەی ئەمریکا، لە پەراوێزی کۆبوونەوەکانی کۆمەڵەی گشتیی نەتەوە یەکگرتووەکان لە نیویۆرک، هۆشدارییەکی توندی دا لە ئەگەری تەشەنەسەندنی جەنگی نێوان ڕووسیا و ئۆکرانیا و ڕایگەیاند کە ئەگەری زۆر هەیە ئاگرەکەی بگاتە ناو خاکی وڵاتانی دیکەش.
ڕوبیۆ لە لێدوانێکدا بۆ ڕۆژنامەنووسان ئاشکرای کرد: "لە نێوان ئەو دەیان نیگەرانییەی لەسەر جەنگی ڕووسیا و ئۆکرانیا هەمانە، مەترسییەکی گەورە هەیە کە شەڕەکە فراوانتر بێت و سنوورەکان ببڕێت بەرەو ناوچەی نوێ."
وەزیری دەرەوەی ئەمریکا سیناریۆ مەترسیدارەکانی تەشەنەسەندنی شەڕەکەی بەمجۆرە خستەڕوو:
هێرشی فرەڕەهەند (هایبرید) یان کردەوەی تێکدەرانە: پەنابردنی لایەنەکان بۆ هێرشی ناڕاستەوخۆ کە دەکرێت وڵاتانی دراوسێ و ناوچەکە ڕابکێشێتە ناو ململانێکە.
هەڵەی پێشبینینەکراو و هەڵەسەنگاندن: وەک ئەوەی فڕۆکەوانێک بە هەڵە سنوور ببەزێنێت و بە ئاراستەی پێچەوانە بفڕێت، ئەمەش بە شێوەیەکی لەناکاو هەمووان دەخاتە ناو جەنگێکی ڕاستەقینە و ڕووبەڕووبوونەوەی ڕاستەوخۆوە.
ڕوبیۆ جەختی لەوەش کردەوە کە ئەم سیناریۆیانە جێگەی دڵەڕاوکێیەکی ئێجگار قووڵن و واشنتن لە کۆبوونەوە بەردەوامەکانیدا لەگەڵ نوێنەرانی وڵاتانی جیهان ئەم هۆشدارییە بە فەرمی دەخاتە ڕوو، چونکە مەترسییەکان ڕاستەقینەن.
ئەم لێدوانە توندانەی وەزیری دەرەوەی ئەمریکا ڕاستەوخۆ دوای کۆبوونەوەیەکی تایبەتی ناوبراو هات لە نیویۆرک لەگەڵ سێرگی لاڤرۆڤ، وەزیری دەرەوەی ڕووسیا.