هەرێم نیوز

وەزارەتی دەرەوەی ویلایەتە یەکگرتووەکانی ئەمریکا ڕایگەیاند، عەلی زەیدی، سەرۆک وەزیرانی عێراق و مارکۆ ڕوبیۆ، وەزیری دەرەوەی ئەمریکا لە میانی کۆبوونەوەیان لە شاری نیویۆرک، ڕێککەوتوون لەسەر گرنگیی هەڵوەشاندنەوەی سەرجەم ئەو گروپە چەکدارانەی کە واشنتن بە "تیرۆریستی" ناوزەندیان دەکات، هاوکات ڕێگری کردن لە ئەنجامدانی هەر هێرشێک لە خاکی عێراقەوە بۆ سەر وڵاتان و پیادەکردنی تەواوەتیی سەروەریی نیشتمانیی عێراق.

تەوەرەکانی دیداری نیویۆرک
بەپێی ڕاگەیەندراوە فەرمییەکەی وەزارەتی دەرەوەی ئەمریکا، ئەم دیدارەی عەلی زەیدی و مارکۆ ڕوبیۆ لە پەراوێزی بەشدارییکردنی سەرۆک وەزیرانی عێراق لە ٨١ەمین خولی کۆبوونەوەکانی کۆمەڵەی گشتیی نەتەوە یەکگرتووەکان لەم مانگی ئەیلوولەدا بەڕێوە چوو، تێیدا هەردوولا تاوتوێی داهاتووی هاوبەشیی ستراتیژیی نێوان واشنتن و بەغدایان کرد.

لە لایەکی ترەوە، نوسینگەی ڕاگەیاندنی سەرۆک وەزیرانی عێراق بڵاوی کردەوە، حکومەتی عێراق بەردەوام کار دەکات بۆ پوتەوکردنی پەیوەندییەکان لەگەڵ ئەمریکا و بەرزکردنەوەی ئاستی هاوبەشی لە بواره جیاوازەکاندا، بەتایبەت لە کەرتی ئابووریی بونیاتنەر کە بەرژەوەندیی هاوبەشی هەردوو گەل بپارێزێت.
زەیدی لە کۆبوونەوەکەدا جەختی لە پێداگریی دەسەڵاتی بەغدا کردووەتەوە لەسەر جێبەجێکردنی مافە سەروەرییەکان و برەودان بە ڕێکارەکانی سنووردارکردنی چەک لە دەستی دامەزراوە فەرمییەکانی دەوڵەتدا، بەپێی بنەما دەستووری و یاساییەکانی عێراق.

مەرجەکانی واشنتن و پشتیوانی بۆ بەغدا
وەزارەتی دەرەوەی ئەمریکا ئاشکرای کرد: "مارکۆ ڕوبیۆ و عەلی زەیدی کۆک بوون لەسەر پێویستیی دەستبەجێ هەڵوەشاندنەوەی گروپە چەکدارەکان لە ناوخۆی عێراق و کۆتایی هێنان بە مەترسییەکانیان، تاوەکو دڵنیایی بیدرێت لەوەی هیچ پەلامارێک لە سنوورەکانی عێراقەوە بۆ سەر ناوچەکە ئەنجام نادرێت و دەوڵەت بتوانێت دەسەڵاتی تەواوی خۆی بسەپێنێت."

لە لایەکی دیکەشەوە، مارکۆ ڕوبیۆ، وەزیری دەرەوەی ئەمریکا باسی لەوە کردووە: "واشنتن بە تەواوی پشتیوانی لە هەوڵەکانی حکومەت و گەلی عێراق دەکات بۆ بەدیهێنانی سەقامگیریی ناوخۆییی هەمیشەیی، گەشەپێدانی ئابووری و کرانەوەی زیاتری بەغدا بەڕووی کۆمەڵگەی نێودەوڵەتیدا، لەگەڵ پاڵپشتیکردنی هەنگاوەکانی دەوڵەت بۆ چەسپاندنی سەروەریی یاسا."

پاشخانی فشارە دیپلۆماسییەکان
دیداری نێوان سەرۆک وەزیرانی عێراق و وەزیری دەرەوەی ئەمریکا لە کاتێکدایە کە واشنتن فشارێکی چڕی خستووەتە سەر بەغدا بۆ چەکداماڵینی گروپە چەکدارە نزیکەکانی تاران تاوەکو کۆتایی ئەم مانگی ئەیلوولە؛ ئەم پرسە بە یەکێک لە گەورەترین ئاڵۆزییە سیاسی و ئەمنییەکانی بەردەم عێراق داده‌نرێت لە کاتێکدا کشانەوەی بەشێک لە هێزەکانی هاوپەیمانان بەپێی خشتەی کاتی نزیک بووەتەوە، حکومەتی بەغداش لە هەوڵدایە لە ڕێگەی دانوستانی دیپلۆماسی لە نیویۆرک ڕێگری لە سەپاندنی هەر سزایەکی دارایی نوێی ئەمریکا بەسەر کەرتی ئابووریی عێراقدا بکات.