هەرێم نیوز
٦١ پارێزەری سلێمانی داوایەکی فەرمییان ئاڕاستەی سەرۆکی دادگای تێهەڵچوونەوە و سەرۆکی فەرمانگەی داواکاری گشتیی سلێمانی کرد و ڕایانگەیاند، ڕۆژانی دادگاییکردنی لاهوور شێخ جەنگی و هاوڕێکانی دەبێتە ڕۆژێکی نائاسایی، بەهۆی ناردنی هێزێکی زۆری چەکدار و بە سەربازگەکردنی دادگا.
مەترسییەکانی بڵاوەپێکردنی هێز لە دادگا
ئەمڕۆ چوارشەممە ٩ی ئەیلوولی ٢٠٢٦، لە بەیاننامەیەکدا کاتێک ڕوویان لە سەرۆکی دادگای تێهەڵچوونەوە، سەرۆکی داواکاری گشتی و مامۆستایانی ئایینی کردووە، پارێزەران ئاماژەیان بەوە کردووە دادگا شوێنی چەسپاندنی دادپەروەری، یەکلاکردنەوەی کێشەکان، گێڕانەوەی ماف بۆ مافخوراو و سەپاندنی سزایە بەسەر پێشێلکارانی یاسادا.
لە بەیاننامەکەی پارێزەراندا هاتووە: "ئێستە دۆسیەی دوو هاووڵاتیی حیزبێک لە دادگای سلێمانیدا هەیە و قۆناغی دادگاییکردن تێیدا بەردەوامە، بەڵام ڕۆژانی دادگاییکردن و بینینی ئەو دۆسیەیە، دەبێتە ڕۆژێکی نائاسایی بەهۆی ناردنی هێزێکی زۆری چەکدار و بە سەربازگەکردنی دادگا، ڕێگری لە هاتنە ژوورەوەی هاووڵاتییان دەکرێت بەوانەشەوە کە ئەو ڕۆژە ڕۆژی دادبینییەکانیانە، سکاڵاکار بن یا سکاڵالێکراو، جگە لە ڕێگری بێئەندازە لە پارێزەرانیش بۆ بینینی داواکانیان."
زیانەکانی پەکخستنی دادگا بەسەر هاووڵاتییانەوە
پارێزەران جەختیان لەوە کردووەتەوە کە ئەم ڕەفتارە جگە لەوەی مامەڵەیەکی تەواو نایاساییە و بێڕێزیکردنە بەرامبەر دادوەران، پارێزەران و سەربەخۆیی دادگا، هۆکاریشە بۆ ستەمێکی زۆر بەسەر هاووڵاتییاندا.
لە بەیاننامەکەدا زەرەرمەندبوونی توێژە جیاوازەکان ڕوونکراوەتەوە:
•ژنانی بێ بژێوی: دواکەوتنی داوای بژێویی ژنانی بێدەرامەت و بێ منداڵ بۆ زیاتر لە مانگێک.
•شایەتەکان: ناچاربوونی شایەتەکان بە گەڕانەوە و ئامادەنەبوونەوە لە دادگا، کە دەبێتە هۆی فەوتانی مافی هاووڵاتییان.
•تۆمەتبارە بێتاوانەکان: درێژکردنەوەی ماوەی ڕاگرتنی ئەو تۆمەتبارانەی کە لە بنەڕەتدا بێتاوانن و کارەکانیان بۆ ناکرێت.
•دانیشتووانی شارۆچکەکان: گەڕاندنەوەی ئەو نەخۆش و کەسانەی بە بێدەرامەتی لە شار و شارۆچکەکانی دەرەوەی سلێمانییەوە دێن و ناتوانن بچنە ژوورەوە.
داواکاریی پارێزەران
لە کۆتایی داواکارییەکەیاندا، پارێزەرانی سلێمانی جەختیان کردووەتەوە: "داواکارین هەڵوێستی ڕژدتان هەبێت لەپێناو پاراستنی شکۆی دادگا و سەروەریی یاسا. سکاڵاکار و تۆمەتبار لە هەر کەیسێکدا هەر کێ بن و پلە و ناسینیان هەرچی بێت، ناکرێت تەواوی دادگا لە ڕۆژی دادبینییەکاندا پەکبخرێت. دادگا موڵکی تایبەتی هیچ کەس و لایەنێک نییە و دەبێت ڕێگری لەم بابەتە بکرێت."