هەرێم نیوز
عەلی زەیدی، سەرۆکی ئەنجومەنی وەزیران ڕایدەگەیەنێت، گەندەڵی لە زۆربەی بارەکاندا لە زیادەڕۆییکردن لە خەمڵاندنی تێچووی پڕۆژەکانەوە دەستپێدەکات،، ئاماژەی بەوەش کردووە، پێداچوونەوە بۆ گرێبەستەکانی پێشوو و داهاتوو دەکرێت لەسەر بنەمای خۆپارێزی باشترە لە چارەسەر.
ئەمڕۆ پێنجشەممە، 27ـی 8ـی 2026، لە میانی کۆبوونەوەیەکدا لەگەڵ سەرۆک و ئەندامانی لیژنەی دەستپاکی پەرلەمان، عەلی زەیدی، سەرۆکی ئەنجومەنی وەزیران ڕایگەیاند، دەوڵەت پشت بە دوو کۆڵەکەی سەرەکی دەبەستێت کە بریتیین لە ياسا و دەستپاکی.
ڕوونیشیکردەوە، حکومەت لە شەڕێکی سەختدایە دژی گەندەڵی و وشککردنی سەرچاوەکانی، هەروەها جەختی لە گرنگیی یەکخستنی هەوڵەکان و بەهێزکردنی هاوکاریی نێوان هەردوو دەسەڵاتی یاسادانان و جێبەجێکردن کردەوە تاوەکو پشتیوانی لە ڕێکارەکانی بەرەنگاربوونەوەی گەندەڵی و ڕاوەدوونانی تێوەگلاوان بکات.
ئاماژەی بەوەش کراوە، سەرۆک وەزیران باسی لەوە کردووە حکومەت کار دەکات بۆ گرتنەبەری وردبینیی پێشوەختە و دوایی بۆ گرێبەستە حکومییەکان، بەپێی بنەمای خۆپاراستن باشترە لە چارەسەر، بە مەبەستی کەمکردنەوەی بەفیڕۆدان و پاراستنی سامانی گشتی.
هاوكات لیژنەی دەستپاکی پەرلەمان جەختی لەسەر پێویستیی چاوخشاندنەوە بە گرێبەستە حکومییەکانی پێشوودا کردووەتەوە کە گومانی گەندەڵییان لەسەرە یاخود زیادەڕۆیی لە تێچووەکەیاندا کراوە.