هەرێم نیوز
دەستەی دەروازە سنوورییەکانی عێراق ڕایدەگەیەنێت، بەهۆی جێبەجێکردنی سیستەمی ئەلیکترۆنییەوە داهاتی حەوت مانگی یەکەمی ئەمساڵ بەرزبوونەوەی بەرچاوی بەخۆیەوە بینیوە و دوو تریلیۆن و ٥٠٠ ملیار دیناری تێپەڕاندووە.
ئەمڕۆ دووشەممە، 24ـی 8ـی 2026، عومەر وائیلی، سەرۆکی دەستەی دەروازە سنوورییەکانی عێراق ڕایگەیاند، بەهۆی جێبەجێکردنی سیستەمی ئەلیکترۆنی و بەستنەوەی سەرجەم دەروازەکان بە تۆڕی سەرەکیی بەغداوە، داهاتی حەوت مانگی یەکەمی ئەمساڵ ٢.٥ تریلیۆن دیناری تێپەڕاندووە، کە تەنیا لە مانگی تەممووزی ڕابردوودا بەرزبوونەوەیەکی بەرچاوی تۆمار کردووە و گەیشتووەتە نزیکەی ٥٦٠ ملیار دینار.
عومەر وائیلی ئاماژەی بەوەش کردووە، کۆنتڕۆڵکردنی ئەلیکترۆنی ڕۆڵی سەرەکیی هەبووە لە کەمکردنەوەی دەستوەردانی مرۆیی و زیاترکردنی شەفافییەت و سەپاندنی چاودێریی ناوەندی؛ ئەمەش بووەتە هۆی ئاشکراکردنی دەیان سەرپێچی و ساختەکاری لە وەسفی جۆری کاڵاکاندا، کە بە مەبەستی خۆدزینەوە لە باجی گومرگی و بەهەدەردانی سامانی گشتی ئەنجام درابوون.
ناوبراو ڕوونیشی کردەوە کە هەوڵەکان تەنیا لە لایەنی داراییەوە کورت نەبوونەتەوە، بەڵکو پاراستنی ئاسایش و تەندروستیی کۆمەڵگەش دەگرنەوە لە ڕێگەی ڕێگریکردن لە هاتنەژوورەوەی کاڵای بەسەرچوو و قەدەغەکراو؛ لەم چوارچێوەیەشدا و دوای بەدواداچوونی مەیدانیی ڕاستەوخۆی سەرۆکوەزیران، زنجیرەیەک ئۆپەراسیۆنی دەستبەسەرداگرتن ئەنجام دراون.
لە کۆتاییدا جەختی لەوە کردەوە کە فراوانکردنی تۆڕی ئەلیکترۆنی دەرفەتەکانی دەستکاری و گەندەڵی بە تەواوی کەم دەکاتەوە و چاودێرییەکە پێشوەختە دەبێت، ئەمەش ئۆتۆماتیکردنی دەروازەکانی کردووەتە پێویستییەکی سیادی و ئابووری بۆ بەهێزکردنی بنەماکانی حکوومەتی ئەلیکترۆنی و دەستپاکی.